企業強人丨神仙霸總陳豪將與龔嘉欣吵大鑊 譚俊彥張曦雯親密戲尷尬多過浪漫

TVB劇集《企業強人》熱播中，陳豪（阿Ｍo）、龔嘉欣、張曦雯、譚俊彥及姜大衞（John哥）等呢日出席宣傳活動，大家分成兩組玩遊戲，眾演員喺台上玩鬥快pack包裹，連John哥都玩埋一份。

《企業強人》呢日出席宣傳活動。

嘉欣坦言一開始有啲擔心要扮細個啲嘅角色，阿Ｍo讚嘉欣好有快遞員嘅感覺，講到阿Ｍo喺劇中霸氣派股份，被網民封為「神仙霸總」，阿Ｍo笑言大家對股份都好有期望，透露緊接嘅劇情有好大變化，嘉欣爆阿Ｍo唔記得劇情，更預告二人即將嗌大交。

嘉欣坦言一開始有啲擔心要扮細個啲嘅角色。
阿Ｍo早前拍片惡搞《溏心風暴之家好月圓》笑言中秋節與眾同樂，搞笑之餘仲勾起觀眾唔少回憶，阿Ｍo話中秋咁開心就拎啲以前嘅嘢出嚟講吓！

阿Ｍo早前拍片惡搞《溏心風暴之家好月圓》，笑言中秋節與眾同樂。

而譚俊彥同張曦雯嘅親密戲日前播出，畫面睇落非常唯美，不過佢哋笑指拍攝過程尷尬多過浪漫，張曦雯第一次拍呢啲場口，尤其要拍視點對望，要望住個攝影師，張曦雯拍嗰陣係有啲尷尬，譚俊彥話攝影師啲員工福利等咗好耐。

譚俊彥同張曦雯話拍親密戲，睇起嚟畫面唯美，但其實拍攝過程好尷尬。