張家輝親證相隔廿年再拍劇 夥胡杏兒與前TVB幕後回歸視壇

由 張家輝 主演、內地演而優則導嘅 馬浴柯 所執導嘅內地電影，早前成為暑假檔期黑馬，喺內地票房勁收超過4億人民幣。最近電影嚟香港上映，呢日家輝同導演現身香港嘅首映禮，繼11年前喺《掃毒》合作演出，年前家輝參演馬浴柯首部執導長片《怒潮》而成為老友，呢次家輝再度演出馬導嘅作品，兩人同係演而優則導，對動作場面嘅要求亦相當合拍，為求效果大家都唔錫身願意親自上陣。

張家輝同馬浴柯因為當年拍《掃毒》而成為老友
而呢日家輝亦親證一個震憾嘅消息，就係佢相隔廿年再拍劇，將夥拍視后胡杏兒、內地演員曾舜晞合作演出《芻狗之血》，翻拍外國嘅刑偵題材劇集。家輝話俾故事吸引出山演出，同時亦因為受到TVB昔日嘅幕後拍檔誠意邀請：「舊拍檔歐冠英同導演蘇萬聰最近同投資方買咗一個外國IP，有唔同地區都買咗嚟重拍，如果故事唔好唔會吸引咁多人買重製版權，加上我咁多冇拍劇，應該幾有新鮮感。」
呢日家輝仲指自己將相隔20年再同一班老拍檔拍新劇

2004年家輝同歐冠英仲有蘇萬聰合作劇集《天涯俠醫》，亦係佢最後一部喺TVB擔正演出嘅作品。 家輝亦視呢次係一大挑戰，仲覺得自己好似奧運火炬手一樣，接棒重拍責任重大，對於拍檔胡杏兒，家輝暫時未同對方聯絡，要等到開鏡時先正式見面。

至於由家輝自導自演嘅電影《贖夢》雖然經已去咗唔同嘅外國影展參展，但係尚未有正式上映時間，作為好友嘅馬浴柯爆已率先欣賞電影，大讚家輝執導功力。