張敬軒見面會場面墟冚 兩千粉絲無懼紅雨通頂排隊

張敬軒日前喺唱片公司嘅三層期間限定概念店舉行見面會。雖然見面會當日天文台發出紅色暴雨警告，不過亦無阻歌迷熱情，唔只早前已經登記好、來自五湖四海嘅600位歌迷無懼紅雨，一早到場排隊等候入場，過千名未能入場嘅歌迷亦站滿舖外街道及時代廣場外的空地圍觀，場面墟冚。加上同日亦係軒仔嘅彩膠碟及白膠碟開賣日子，為搶得心頭好，歌迷早一晚就已經夜排，所以活動當日嘅高峰人流一度多達二千幾人，非常誇張。 

張敬軒日前喺唱片公司嘅三層期間限定概念店舉行見面會。

而見面會期間，軒仔面對歌迷們嘅「攬攬」要求都來者不拒，見面會亦變成「擁抱大會」。除咗見面、擁抱合照，軒仔亦發揮幽默本色同歌迷傾偈，例如見到一位身高超高嘅女歌迷，就會問：「你食咩大㗎？食到咁高。」有歌迷向軒仔報喜表示自己快要結婚，軒仔又問道：「你結婚，你諗清楚㗎嗱？」全場即時爆笑，最後當然衷心送上祝福。有歌迷跟軒仔攬攬後，軒仔搞笑問：「你好緊張喎，你個心跳得咁快，隻手又震晒。」 

過千名未能入場嘅歌迷亦站滿舖外街道及時代廣場外的空地圍觀，場面墟冚。

見面會結束後，仍然有大量歌迷喺舖外等候為見軒仔一面，為咗答謝大家，軒仔特意走到概念店busking的玻璃櫥窗位置跟大家打招呼：「多謝大家，今日辛苦晒啦，落雨濕濕。」同時又向店舖對面時代廣場圍觀的歌迷say hello：「Hello對面嘅朋友辛苦晒喇，多謝晒，辛苦大家啦，好多謝你哋好多人都山長水遠嚟到。」軒仔更不忘呼籲大家留港消費，又身體力行喺答謝完大家後，即到公司旗下嘅鐘錶珠寶店消費，又化身銷售員向顧客落力推銷金器首飾，成功sell客。

張敬軒去其所屬公司旗下嘅鐘錶珠寶店消費，又化身銷售員向顧客落力推銷金器首飾，成功sell客。