林智樂21歲生日盼能遇上好歌 獲丁噹邀請任個唱嘉賓有壓力

今個月25號就係 林智樂 Felix 嘅21歲生日，佢嘅fans呢日就提早為佢慶祝，Felix非常享受同fans共聚嘅時光，除咗同大家玩小遊戲外，仲以自己把靚聲答謝眾人。
林智樂同fans一齊提早慶祝佢 21歲生日。
同一個fans club已經係第3年同Felix一齊過生日，而今年除咗有香港嘅fans外，仲有唔少由外地嘅fans嚟到香港同佢一齊慶祝，對於大家咁錫自己，Felix就話好多謝大家嘅支持，佢又指當初自己仲諗緊會唔會有外地嘅粉絲嚟，點知真係有fans不辭勞苦嚟到現場，感覺好特別呀。

Felix嘅生日願意係可以上多啲好嘅綜藝節目。
踏入21歲，Felix表示自己嘅生日願意係可以上多啲好嘅綜藝節目，特別係音樂類嘅，同時亦希望做多啲同遇多啲好嘅歌。講到好歌，Felix就話本月底預計會推出《年輪海》嘅特別版，當中仲邀請咗一位佢好想合作嘅前輩同佢一齊做呢件事，但佢話呢個合作未必係crossover合唱，至於係點合作，Felix就叫大家期待下喇。
唔少fans由外地嚟到香港參加Felix嘅生日。
對於獲丁噹邀請擔任香港演唱會嘅開幕表演嘉賓，Felix話以前成日都聽到對方個名，估唔到而家可以合作，感覺好夢幻，Felix又話對於到時要幫手warm up個場，自己都有少少壓力呀。
林智樂為大家獻唱唔少歌。