無窮之路IV｜人機不敵中東高溫幾乎中暑 非洲惡菌攻陷全體攝製隊

由 無綫新聞及資訊部 製作、阮小清監製、岑應編審； 陳貝兒 主持嘅《無窮之路IV—一帶一路》下星日開始播映。而今個星期日將率先播出製作特輯。十集節目中，公開攝製隊花費兩個月時間、走訪馬達加斯加、埃及、希臘、塞爾維亞、沙特阿拉伯、阿聯酋同肯尼亞七個一帶一路沿線國家拍攝。

陳貝兒同攝製隊直擊麥加朝聖人潮，高溫令人機同樣幾乎投降
攝製隊一如過往幾輯，今次拍攝繼續面對重重困難，其中一個最大挑戰，就係同中東仲有沙特阿拉伯嘅「高溫」搏鬥。Janis喺製作特輯透露，喺沙特阿拉伯拍攝年度盛事「麥加朝聖」期間，氣溫高達50多度，最終導致現場千幾人熱死。
望見張相都感受到50度高溫有幾難頂

而Janis同攝製隊喺現場亦瀕臨中暑狀態，連攝影器材，亦因為過熱頻頻自動熄機「抖暑」，披住長黑袍同黑頭巾、當時熱至滿面汗珠嘅Janis，事後憶述話：「我哋不停流汗，熱到暈咁滯，基本上係有瀕臨中暑嘅徵狀；加上拍攝朝聖嗰日現場人逼人，同埋我又著住黑袍，確係熱上加熱，我成身濕晒。好彩有個好友善嘅穆斯林，佢即刻喺我臉上面噴水，同埋畀咗粒糖我。 然後我哋啲（攝影）機，roll咗分零、兩分鐘，都已經全部overheat down晒機。」
烈日當空連攝影器材都過熱罷工

除咗「高溫挑戰」，攝製隊亦要面對抵抗力考驗！因為「麥加朝聖」現場萬人空巷，完成拍攝嘅攝製隊紛紛出現疑似中東呼吸綜合症徵狀，不過為追趕拍攝進度，攝製隊依然繼續趕路同拍攝，相當專業。Janis回憶當時情況話：「拍完朝聖之後大家就相繼病倒，係咁瘋狂咳，又發冷又發燒咁，感覺好似中咗covid，大家都係病住出發去歐洲。」 
雖然大家打足防疫針，不過到非洲時亦不敵極差嘅衛生

經常周遊列國拍攝節目的 Janis，原來今次亦係首訪非洲。為安全問題，佢出發更已打足破傷風、黃熱、傷寒及腦膜炎針等確保安全。當身處全世界最貧窮國家之一－馬達加斯加時，眾人雖然已相當小心，但仍不敵當地嘅超惡劣衛生環境全軍肚瀉，有工作人員更一度驚現上吐下瀉情況。
全體成員於馬達加斯加都遇上腹瀉問題

Janis話：「其實我哋連擦牙都已經用支裝水，沖涼時又唔敢擘大個口同埋對眼，因為有人話如果當地啲水入咗身體入面，就會有機會患上霍亂。雖然已經咁小心，但我哋個個最後都有肚屙，有啲同事仲上吐下瀉。」
《無窮之路IV》製作特輯星期日晚播出

《無窮之路IV—一帶一路》製作特輯 星期日晚(9月29號) 22:00 翡翠台

《無窮之路IV—一帶一路》10月6號起 逢星期日晚 22:00 翡翠台