企業強人｜陳豪爆笑展現普通話急口令 龔嘉欣張曦雯洗樓宣傳鬥快Pack包裹

熱播劇《企業強人》一眾演員陳豪、譚俊彥、姜大衛、張曦雯、龔嘉欣，聯同監製羅永賢齊齊去到北京宣傳，又去到當地嘅騰訊大樓進行洗樓式宣傳，不單只拎住大聲公同大家介紹各自嘅角色，仲大派禮物，令大樓內嘅員工都非常興奮。

《企業強人》幾位主要演員日前到北京宣傳

除咗近距離交流，五位更現場玩Pack包裹同急口令遊戲，喺Pack包裹遊戲中，嘉欣就因為Pack得最快成為「企業龍頭」；至於急口令遊戲，阿Mo主打一個蒙混過關，用極速完成任務，同John哥嘅口齒伶俐版簡直成為「天堂與地獄」級嘅對比。 雖然阿Mo講普通話麻麻地，不過講到沖咖啡就絕對冇問題！一場去到北京，阿Mo都有一展身手，顯露沖咖啡技術，令大家都對呢杯阿Mo咖啡讚口不絕！ 

幾位商界高手同大家近距離見面，阿Mo仲示範普通話急口令

而去到夜晚嘅映後活動，監製Marco都玩埋一份，同五位一齊跳下舞。五位演員仲準備畫有佢地5個Q版肖像嘅驚喜為25號生日嘅Marco慶生，真係好有心啊！其後，Marco同大家分享拍攝呢套劇嘅契機，佢就話，有一日帶住百幾人去深圳拍戲，以前嘅話，大家一到埗就要去超級市場買嘢，但而家已經唔洗，因為已經有人幫手準備好。時代變遷令生活變得更方便，所以Marco就覺得，想拍一套同物流業有關嘅劇集。