高海寧跨界做主持亮相央視 興奮新技能解鎖獲佘詩曼加持

高海寧Ko Ling 選美後晉身娛樂圈一直努力拼博，去年喺神劇《新聞女王》中憑力爭上游嘅許詩晴(Cathy)將事業推上高峰，年初喺《萬千星輝頒獎典禮2023》膺「最佳女配角獎」，早前再憑角色喺《亞洲影視內容大獎》獲女配角組合金獎殊榮，主角佘詩曼都有份得到女主角金獎，而獲封亞洲視后。

高Ling近年事業發展理想，近日仲擔任內地大型節目主持
高Ling得奬之餘工作量及知名度亦成正比，馬不停蹄走埠工作，仲成功喺央視現身同觀眾見面，成就解鎖。高Ling近日喺西安出席「第十一屆絲綢之路國際電影節」，以電影演員代表的身份擔任開幕式嘉賓主持，見高Ling夥拍幾位重量級主持，依然非常亮眼，加上佢擁有一口流利普通話令佢發揮自如。
日前佢喺西安，參與主持絲綢之路國際電影節嘅開幕

高Ling完騷後上載照片指「和央視的主持人一起合作主持，心情緊張，畢竟是自己第一次擔任大show嘉賓主持，但又十分榮幸受此重任，幸好過程很順利。一直喜歡挑戰新嘗試，保持堅持進步的心，非常感謝主委會的信任，也感謝三位專業主持人的共同努力。新技能解鎖，開心。」
事後仲以靚相分享自己成就解鎖嘅喜悅

高Ling當晚以一身高貴大方嘅入膊連身裙擔任主持，顯出優雅氣質。而喺活動前，佢又特意換上一套公主裙同大家見面，並為自己影返輯靚相，「難得穿一次蓬蓬裙，做了半日的公主。」呢輯靚相公開後，佘詩曼、蔡卓妍、湯洛雯、郭柏姸紛紛留言，話喜歡高Ling嘅一頭長髮同笑容，江嘉敏又大讚未見過咁靚嘅公主。此外，高Ling繼早年有份參演內地人氣劇集《三十而已》之後，近日再與同一導演合作，再有新劇《半熟男女》上架，看來努力並沒白廢，成功開拓內地巿場。

高Ling嘅不懈努力非常值得學習