《破·地獄》打入東京國際電影節 許冠文唱出面對生死歌詞被觸動

黃子華 許冠文Michael 衛詩雅 朱栢康 周家怡 秦沛 金燕玲等主演；以殯儀業為題材嘅電影《破·地獄》即將上映。新片未公映已引來海外關注，繼入圍夏威夷國際電影節參展電影後，亦獲選為第21屆香港亞洲電影節開幕電影，以及晉身今屆東京國際電影節。

黃子華同許冠文兩大笑匠嘅新作，未上映已入圍唔同影展
導演陳茂賢、黃子華、許冠文、衛詩雅及朱栢康更會親自飛抵當地出席首映，而影展海報同步驚艷登場，由美術大師張叔平親自操刀設計！

《破·地獄》集結兩大香港神級笑匠黃子華同許冠文演出，兩人自《神算》後相隔32年再次喺銀幕上合作，演繹一對性格南轅北轍嘅殯儀業拍檔，合演一段感動人心，引領生人與逝者離苦得樂嘅人生旅程。
扮演兩代殯儀從業人員嘅佢哋，以影片分享人生故事

呢日拍攝其中一場關鍵戲，講述傳統喃嘸老師傅文哥(許冠文 飾)，對於初入行做禮儀師嘅拍檔魏道生(黃子華 飾)，處事手法離經叛道相當不滿，魏道生欲跟對方請教示好，喺餐廳向文哥剖白做禮儀師原委。因疫情拖垮生活，魏無奈轉行，子華演出時講到動情之處，難掩激動哽咽，拍完後更走到一邊拭淚，然後又迅速回復狀態拍攝，非常專業。

兩個角色一曲泯恩仇，子華同Michael破天荒合唱南音，既合拍又投入，令到導演都忘記嗌Cut。背熟歌詞嘅子華就笑稱唔公平，皆因自己位置「睇唔到大字報」，結果唱到最尾忘詞，令現場充滿笑聲。
拍攝呢場時子華同Michael又一齊合唱南音

Michael為演好今次喃嘸師傅角色，開拍前特意拜師學習二胡同南音演唱，仲有意外收穫：「以前我爸爸媽媽由細至大都係唱南音嘅，我就唱英文歌㗎嘛…以前覺得佢哋好老土，但而家練練吓，發現南音嘅深情同粵曲真係好好聽，尤其係講面對生死時啲歌詞，特別有一句好鍾意，係講眨下眼人生就過去，好有feel。」
而講到同子華相隔超過30年再合作，Michael感慨萬千：「當時諗將來有機會，我哋再拍一部喜劇就好，發夢都估唔到要咁耐之後，估唔到又揾到一部唔笑嘅喜劇、係新穎嘅、係講香港嘅戲，再拍檔仲要對手戲咁多，真係好開心，好大突破。」
兩大笑匠合作，以生離死別作主題嘅新作相當吸引

子華亦表示今次合作感受到Michael依然如昔，言詞鋒利：「30年前嘅《神算》我做佢嘅編劇，真係同佢一齊去度個劇本，度咗幾個月，每日都見到佢，知道晒佢嘅思維、方式 、速度。基本上呢次見返佢係冇變過，所有嘅速度，嗰種嘅所謂sharpness，尖銳真係一針見血，佢嘅judgment絕對信得過，佢講過嘅說話真係要睇重。」
秦沛亦都有參與新片演出

當日拍攝正值嚴寒，晚上氣溫最低只得8.1度，女主角衛詩雅同有份演出的秦沛都有駐足現場，觀賞兩大笑匠鬥戲，這晚未有戲份的詩雅更是專程冒冷探班，笑謂：「我專登嚟偷師，呢場我知道好好睇。所以專登揸車過嚟。」足證子華和Michael同場魅力。