金式森林煞科｜郭晉安送長子英國入學不忍淚崩 陳曉華甜笑回應與朱敏瀚婚訊

郭晉安、羅子溢、何廣沛（Matthew）、羅天宇、陳浚霆、陳曉華（Hera）、何依婷、羅蘭、白彪、陳榮峻同太太吳香倫等參與劇集《金式森林》煞科宴，場面熱鬧。劇中同Hera上演忘年戀嘅安仔，啱啱先陪完大仔郭令山去英國開學，喺送阿仔返宿舍途中，兩父子展開咗段前所未有深情對話。

劇集《金式森林》煞科宴，場面熱鬧，一眾演員開心相聚。
安仔指當時令山自覺不足，仲話「高估咗自己」，安仔被阿仔說話觸動，但作為爸爸就要強忍，理性態度面對，感性心情去接收兒子心聲，寄語阿仔要學識獨立、堅強、好好裝備自己面對人生，當令山知道入住宿舍後就同爸爸分開一段時間，展開獨立生活，不禁回望咗安仔兩次，呢幕令安仔好心酸，當阿仔進入校園後，安仔忍唔住淚崩，受訪時講起件事，佢都有啲眼紅紅。

安仔啱啱先陪完大仔郭令山去英國開學，喺送阿仔返宿舍途中，兩父子展開咗段前所未有深情對話。
安仔回復單身後已習慣新生活，前妻歐倩怡早前接受訪問時，公開透露離婚後要獨力揾錢交租，開始有經濟壓力，對於呢個報道，安仔就淡然表示唔知道消息，只知道對方會見小朋友，並對前妻之事不欲多談。

陳曉華一直未就婚訊傳聞作出回應，呢日親自解畫叫大家可以恭喜佢煞科，但唔使恭喜佢其他。
Hera喺劇中飾演安仔太太，近日有傳佢揾到Mr Right朱敏翰，傳出兩人將於年底結婚，一直未就婚訊傳聞作出回應嘅Hera有親自解畫，叫大家可以恭喜佢煞科，但唔使恭喜佢其他，佢仍然係工作至上。

Matthew否認平日有恰Hera，只係大家同事之間嘅交流。
另外，Hera喺劇中挑戰阿媽角色，同佢經常做拍檔嘅Matthew呢次飾演佢其中一個仔，Hera話自己身份唔同咗，受到嘅待遇都唔同咗，但Matthew否認平日有恰Hera，只係大家同事之間嘅交流，認為對方嘅說法可能係想轉移視線。