StarTalk一氣呵成版｜阮經天被林嘉欣大膽言論嚇親 與曾寶儀分享對愛嘅定義

由 曾寶儀 擔任監製嘅都會愛情電影《愛情城事》，當中由10個唔同嘅單元故事結集而成，呢日佢就同其中一個單元故事《病源》嘅兩位主演阮經天同林嘉欣，嚟到《StarTalk》同主播 王鎮泉 一齊傾吓呢套戲嘅拍攝點滴。

監製曾寶儀分享拍攝呢部都市愛情電影嘅緣由
曾寶儀話最初構思呢部電影時，伍伯同李心潔係最早答應演出嘅演員，不過喺拍攝過程中，就feel到心潔都有自己想講嘅故事，於是就邀請佢擔任其中一個單元嘅導演。

被心潔親自指定演出嘅嘉欣，表示收到劇本後，覺得個劇本有心潔嘅影子，因為故事都係講一位女演員，因為拍戲時非常投入，令佢會喺潛意識中發一啲夢，而夢境又係反映緊佢某啲心情，嘉欣指呢個狀況正正係一個演員投入角色後，會游走喺虛同實嘅狀態。
小天同嘉欣今次再合作演出新片

之前喺電影《心理罪之城市之光》入面曾經同嘉欣演夫妻嘅小天，笑言今次再合作最大嘅分別，就係嘉欣會郁呀，因為上一齣電影嘉欣個角色係一個植物人，而今次可以直接面對、感受到彼此嘅情緒同身上嘅溫度。

戲中同嘉欣有唔少親密戲份，小天話拍攝前大家都有好好溝通過，嘉欣仲會指出自己邊啲部位可以畀小天摸，又會問對方咁樣演會唔會OK，雖然相當照顧對手嘅情緒，但小天就有啲不滿，覺得嘉欣搶先講咗自己想講嘅嘢，比自己更加紳士呀。
嘉欣今次同小天有唔少親密戲份

小天指自己係一個容易察覺到別人情緒嘅人，佢指自己年青時會當面問對方，但隨時自己成長，即時察覺到對方嘅情緒，佢都唔會選擇開口，因為佢知道有時間大家需要嘅係私人空間，而唔係要特別嘅安慰。
小天就指隨坐年齡漸長，自己對伴侶嘅相處方式亦有唔同

問到寶儀喺拍攝過程中，有冇戲癮起想演其中一個角色？佢語自己完全冇諗過，因為坐喺個mon前睇到演員演戲係佢最享受嘅時光，唔想畀人剝奪呢個部分，加上要兼顧幕前同幕後係一件好分心嘅事，而且今次係佢首次做監製，所以寶儀話想專心專注咁去做。

新戲關於愛情，問到三人現時對愛嘅睇法，寶儀指覺得唔應該定義愛係咩樣，因為遇到唔同嘅人就會有唔同嘅狀態去面對。小天指喺每個時期去解讀愛，都會有唔一樣嘅結果； 至於嘉欣就話自己冇答案，但覺得生命同時都喺度進行緊，所以應該要好好去感受，唔好抗拒。