馮德倫演販賣兒童首腦 拍攝時爭啲被肖央勒死

近年專注做導演嘅馮德倫，最近參演咗一部內地電影，戲內更係首度挑戰飾演全片最壞嘅大反派。呢日佢就同拍檔趙麗穎、肖央以及導演五百現身上海首映禮時，佢都話呢個販賣兒童首腦嘅角色，令佢演得好過癮。

馮德倫首次扮演奸角就扮演販賣人口匪徒

戲中有場被肖央報復嘅戲，馮德倫就話拍嘅時候爭啲畀肖央勒死，爭一秒佢就要拍手叫停，因為佢真係被勒到唞唔到氣呀。

趙麗穎呢次飾演小朋友被拐走嘅母親，中途仲要同拐子佬鬥智鬥力，作為人母嘅佢就話喺戲中展現嘅係另一種母愛呀。

趙麗穎因為小朋友被拐而同一班奸角鬥智鬥力