午馬逝世10周年遺孀放映會懷緬 好友齊聚憶當年相處趣事

演出電影多不勝數嘅 午馬 ，2014年因為肺癌離世，遺孀「午馬嫂」馬艷 為記念丈夫，星期日以37年前嘅經典作品《倩女幽魂》，舉行「好友懷念午馬導演10周年特別放映」。午馬女兒 馮智慧 洪金寶 胡楓 姜大衛夫婦 陳淑芬 錢小豪 錢嘉樂 林威 太保 楊盼盼 梁琤 程東 同 黃允材 等大批好友到場支持同懷緬故友。

午馬遺孀馬艷舉辦《倩女幽魂》特別放映場，紀念丈夫離世10周年
電影放映前，先由李琳琳回顧午馬導與演嘅點滴，之後午馬嫂則分享對亡夫嘅思念，而午馬千金馮智慧亦分享對爸爸嘅印象：「其實我唔太知爸爸曾經歷嘅事，佢好多事都係我成長後，由媽咪或者佢哋嘅朋友話我知，我覺得佢係一個好好嘅爸爸，工作或者待人接物上都很善良同積極，我好欣賞佢活在當下、及時行樂嘅精神，所以佢永遠都係我榜樣。」

馬艷同囡囡馮智慧分享過往逸事

馮智慧接受訪問時指，雖然同爸爸相處時間唔多，不過亦曾到片場探班，亦試過幫爸爸接通告，由於年紀太細，所以未曾跟爸爸對過劇本，不過就不時提醒爸爸跟通告背對白。

「午馬嫂」馬艷自丈夫離世後，過去9年多時間一直穿著黑袍紀念，直至今年先改穿便裝。佢又話要特別多謝洪金寶，因為午馬離世忌日係農曆大年初五，所以自始唔去拜年。而大哥大有見及此，就每年新年都會邀請佢同女兒作客，給予溫暖、支持同鼓勵。又指元彪、古天樂、錢嘉樂同錢小豪等都曾雪中送暖。

過往多次合作嘅洪金寶、錢小豪、錢嘉樂同太保都有到場

曾同午馬多次合作嘅洪金寶，就笑指午馬酒量極好，可以由早上7點一直飲到夜晚，就算飲醉都只會瞓覺。而錢小豪同錢嘉樂仲分享唔少往事，過往就曾喺酒店開會一齊度招式，仲笑稱：「我哋兩個十幾歲入行，冇學壞都係因為好彩遇到午馬San 。」
大家分享同午馬拍攝期間相處嘅小故事

午馬嫂仲話：「電影係我先生一生所愛，我用十年時間去學習製作電影，走進他的世界，我做製片都係因為放唔低佢，透過電影世界去重溫他。我當然想女兒也參與電影工作，她亦取得相關課程證書，不過她寧願選擇烘焙工作。」女兒馮智慧笑說：「媽媽想我讀和電影的課程，我已讀了，也合格，證明我有能力參予電影工作，但這並非自己意願，所以我揀選做烘焙師。」