陳德森拍網上節目助抑鬱症患者 李龍基計劃明年王青霞出獄後結婚

由陳德森導演炮製嘅網上節目呢日舉行記招，黃德斌、徐天佑、林祖輝、黃百鳴等多位名人亦有到場支持。曾經受抑鬱問題困擾嘅陳導演，呢次碌爆人情卡，邀請多位好友同專業人士，喺節目中從多方面探討抑鬱症問題。
陳德森炮製網上節目，探討抑鬱症問題。林建明話開拍第二季時會捐六位數支持。
陳德森話雖然喺製作期間都會遇到好多挑戰，但好彩有過來人大姐明林建明嘅支持，仲話對方承諾如果再開拍下一季嘅話，就會捐6位數作為支持，陳德森又指因為自己曾經患過抑鬱症，知道一定要多啲同人溝通，最怕患者就係自己暱埋唔肯同人分享，又唔去了解點樣處理呢樣嘢，所以希望透過呢個節目可以幫到大家。至於講到如果開拍第二季，陳德森就話今次嘅10集已經好剖析到抑鬱症，故若開拍新一季，佢希望到時會講其實症狀，好似自閉、焦慮、妄想症等。
李龍基話等王青霞出獄就同對方結婚。
李龍基未婚妻王青霞雖然仲喺獄中，但有消息指對方將會喺明年7月7號刑滿出獄，基哥呢日都有分享同未婚妻嘅美好計劃，仲話到時自己會喺深圳迎接對方，又指一切已經安排好晒，等對方出嚟後就重新過美好嘅生活。
李龍基話等王青霞出獄就同對方結婚。
李龍基指王青霞出獄後暫時唔可以嚟香港，唯一方法就係改變對方身份，所以佢會盡快同對方結婚，等對方成為李龍基太太後，就可以申請對方來港。雖然仲未擇日子，但已經有好多朋友講定到時到深圳祝賀佢哋，李龍基指婚禮會低調舉行，當然有啲好朋友無辦法唔通知嘅，佢哋就會邀請呢啲好友食餐飯，仲話唔使對方封禮，至於會唔會邀請傳媒採訪？基哥就話大家唔嫌麻煩嘅佢都歡迎。

徐天佑