鍾志光效力無綫35年獲傑出員工奬 不言休追隨92歲胡楓敬業精神

現年63歲鍾志光(鍾仔)獲頒TVB《2024下半年度傑出員工奬》，另外得獎兩位同事分别係人事及行政部黃仕堅、新聞及資訊部陳焜傑，三位得奬者呢日出席頒獎典禮接受奬項，眾多員工為佢哋吶喊打氣。

鍾志光獲頒TVB《2024下半年度傑出員工奬》。

效力TVB 35年首次得最佳員工奬嘅鍾仔心情興奮，覺得多年來工作被受肯定，加上奧運效應令佢咁受歡迎，雖然唔知道邊位員工提名，但佢攞獎同時仍不忘多謝團隊，會將呢份光榮同團隊分享。
鍾志光話自己不言休。
鍾仔多年嚟出演劇集無數，近年固定喺《愛‧回家之開心速遞》中以佳叔角色出現，深受觀眾歡迎，現時雖然冇特別想做嘅角色，但拍劇就令佢體驗到不同人生，佢好記得有次拍劇飾演區議員，被人兜頭淋紅油，令鍾仔好深體會，因為喺現實生活中佢都行得正企得正，應該唔會有呢個遭遇。現階段希望自己身體狀況可以應付到工作，不言休，目標係追隨92歲修哥胡楓嘅敬業精神。
鍾仔話因為熱愛工作，一見打燈就會精神。
鍾仔喺主持TVB巴黎奧運直播嘅半個月裡面，捱通宵更接日更做廠，簡直為工作博到盡，觀眾都好佩服佢嘅敬業精神，鍾仔就話一切因為熱愛工作，一見打燈就會精神，即使拍劇時小休片刻，一聽到嗌埋位無論幾攰都會彈醒，呢啲就係鍾仔一直嘅動力支撐。