胡美儀義賣畫作幫助基層小朋友 攻讀博士課程老公毛俊輝有投訴

資深藝人 胡美儀 呢日捐出15張畫作供義賣籌款，幫助基層小朋友，呢啲畫全部都同情緒有關，原來美儀姐近年淡出幕前，全職投入心理輔導工作，已經完成咗兩個碩士課程，依家仲讀緊博士，老公毛俊輝雖然全力支持太太，但都忍唔住有小小投訴，原來因為美儀姐專心學業，少咗時間陪佢，毛sir仲話想約美儀姐去睇謝君豪嘅新戲，美儀姐都話冇時間。

胡美儀近年鑽研輔導專業，仲正攻讀博士學位
美儀姐要做心理輔導工作，仲要讀書同畫畫，可以話係分身乏術，不過美儀姐話自己依然好鍾意唱歌，所以佢依家plan緊，希望可以將唱歌同心理輔導結合，美儀姐話自己做心理輔導工作多年，加埋過往拍劇，見過人生百態，所以想透過歌曲表達出唔同情緒，亦可以鼓勵有情緒問題嘅人。

近日佢捐出多幅畫作拍賣，以協助基層小朋友