顏米羔劉威煌演唱弘揚中華文化 黃洛姸著新式華服別有一番味道

「千人華服賀國慶 - 華藝雲裳」日前喺伊利沙伯體育館圓滿完成，歌手 顏米羔 劉威煌 黃洛妍 仲有「聲夢2」成員 彭家賢 侯雋熙 陳昊廷 江廷慧 及 李茵彤 組成嘅Plan V ，加上「義務工作發展局」義工大使 胡渭康 ，聯同超過1千名香港、澳門同內地年輕人參與，共同發揚同傳承中華文化，透過傳統同流行文化加上時裝表演，以創意方式加深大家對華服嘅認識。

顏米羔同劉威煌日前以一身華服參與國慶活動
顏米羔首次同60人中樂團同台表演，獻唱一曲《中國夢》，氣勢磅礴，現場觀眾紛紛拍掌叫好。而劉威煌就喺小學生嘅武術同鼓擊下合作歌曲《中國人》，之後佢哋仲話：「華服設計非常新穎，可以出席任何場合，又可以順道令大家更加認識中華文化。」
黃洛姸亦同模特兒示範新式華服

Plan V分別演唱《桃花》同《我愛茶餐廳》；而Janees黃洛姸亦一齊參與演出，喺一眾模特兒示範新式華服時獻唱《活色生香》同《瀟灑走一回》。之後顏米羔同劉威煌再聯同來自香港童軍總會、香港女童軍總會、民安隊少年團同香港聖約翰救傷隊少青團嘅75位年青人合唱《龍的傳人》，最後全場嘉賓同歌手喺台上大合唱《朋友》，為活動劃上咗完美句號。

彭家賢、侯雋熙、陳昊廷、江廷慧同李茵彤組成嘅Plan V亦有參與演出