太陽時隔7年再訪香港開騷 為港迷特別演唱方大同《愛愛愛》

去年回歸嘅韓團BIGBANG成員 太陽 今年再次展開個人巡迴演出，繼早前首爾場同日本場嘅《THE LIGHT YEAR》演出大獲成功之後，太陽睽違7年終於重返香港，以精彩舞台答謝歌迷守候。

太陽終於再次來港舉行演出
兩場於亞洲國際博覽館Arena舉行嘅演出上周五起舉行，太陽先以經典歌曲《Prayer》同《I’ll Be There》為表演揭開序幕，點燃現場氣氛，精湛舞蹈同極具感染力唱功，瞬即令歌迷瘋狂尖叫。
歌迷都非常沉醉於現場氣氛，仲不時跟住大合唱

太陽為回饋大家，仲特別準備BIGBANG嘅串燒歌曲環節，一口氣演唱《BLUE》、《IF YOU》同《LOSER》，勾起歌迷回憶之餘，仲全場近萬人一齊大合唱，緊接又以《BANG BANG BANG》同《FANTASTIC BABY》勁歌熱舞，熱爆全場。
太陽仲為大家準備連串BIGBANG名曲

到演唱《I Need A Girl》時，太陽仲驚喜現身觀眾席，邊演唱邊同歌迷近距離互動，仲用廣東話講「我愛你」，冧爆全場香港Fans。
佢又特別為香港歌迷準備方大同嘅名曲

太陽仲為香港觀眾送上特別驚喜，獻唱方大同嘅《愛愛愛》，展現佢對香港歌迷嘅感謝，最後Fans一齊合唱太陽嘅標誌性歌曲《Eyes, Nose, Lips》同《Seed》，圓滿結束美滿嘅香港站演出。