陳奕迅變Fans與費達拿組隊打波 力敵中國網乒組合被康堤狂笑

有泥地王之稱嘅西班牙球王拿度日前宣佈退役，令唔少網球愛好者都非常心碎，而同佢可以話係一時瑜亮嘅瑞士球王 費達拿 雖然前年已經率先退役，不過近年依舊參與唔少推廣工作，好似佢近日就喺上海出席網球活動，仲吸引樂壇中出晒名嘅網球痴 陳奕迅 同佢同場出現，仲組合出擊力抗中國網球一哥張之臻同乒乓球王子樊振東，最終Eason同費達拿以三盤兩勝，勝出呢場友誼賽。

Eason同費達拿、張之臻仲有樊振東落場較勁
Eason仲為呢次上場早早準備，一早就到場練習，而正場上陣前佢仲獲費達拿嘅親筆簽名，Easn仲話可以同偶像打波係發夢都冇諗過嘅事，自己仲緊張過上台唱歌一樣呀，連阿女康堤都笑佢話未見過爸爸好似Fans咁樣呀。
賽前見面時Eason開心到好似一個小Fans一樣

而早前Eason曾向國家乒乓球代表；巴黎奧運男單金牌得主樊振東，隔空邀約切磋球技，仲買定球拍等樊振東來簽名，呢晚兩人終於相見，樊振東亦依約為Eason簽球拍，而Eason就特別準備簽名回禮。
之後又同樊振東交換簽名禮物

雖然呢日友誼賽球技不及費達拿同張之臻兩位高手，不過Eason歌藝就贏全場，球賽中途佢突然高唱《謝謝儂》舒緩緊張，即時令全場歌迷尖叫歡呼四起。而賽後Eason亦喺社交網站出Post，依舊興奮嘅佢話： 很老實說，可以跟這3位金牌選手出現同一個場合，已經不用多說。我再私心一點，還！要！跟！Roger ！Federer！在！同！一！個！球！場！打！球！呢！。

Eason事後再出Post依然難掩佢嘅興奮心情