破．地獄｜衛詩雅學破地獄拋劍幾乎破相 夏威夷電影節世界首映掌聲滿堂

話題新片《破·地獄》下月中正式上映，，除咗萬眾期待嘅 許冠文 同 黃子華 攜手主演之外，戲中扮演喃嚤師傅文哥(許冠文 飾)千金文玥嘅 衛詩雅，因為家族世代都從事喃嚤工作，導演特別喺開拍前安排Michael、Michelle同 朱栢康 接受破地獄儀式訓練。

衛詩雅於《破．地獄》中扮演許冠文嘅千金
Michelle同戲中嘅哥哥朱康接受特訓時，唔止要學識手持白幡嘅技巧，仲要熟練破地獄儀式嘅多項複雜動作，訓練過程對身體協調性同力量要求都非常高。而Michelle無論對耍劍、拋劍，定係經文背誦，都令人難以想像佢由零開始訓練。
佢同戲中扮演佢哥哥嘅朱栢康一早學習正統破地獄儀式

喺長達九個月嘅特訓當中，Michelle上堂以外亦經常自行練習落足苦功，佢話：「最驚係練唔切，因為確實好多師傅同我講，佢哋真係練咗成三四年先做到，所以成日反而擔心，夠唔夠時間做到。」

Michelle又認為最難嘅係拋劍：「把劍對我嚟講幾重，試過拋劍落嚟差啲劍尖直插面前，我一手擋住，手爆開咗，依家仲有瘌，如果擋唔切，可能把劍就會落喺塊面度。」而另一大挑戰就係背誦大量經文：「我經常都係聽住經文嚟練習，做gym人哋聽音樂，我就聽超度嘅經文，一邊做運動一邊背。」

Michelle練習拋劍時曾曾發生意外幾乎毀容

《破·地獄》雖然尚未上映，不過已獲唔少海外影展關注，早前仲出征第44屆夏威夷國際電影節舉行世界首映！導演兼編劇 陳茂賢 同Michelle日前就親赴夏威夷，Michelle仲係第一次在喺銀幕欣賞全片：「今次係我第一次喺大銀幕度睇，因為之前都係喺細嘅銀幕仔睇部份片段，今日喺正式戲院睇，觀感上放大咗多過十倍。」現場亦有唔少港人，令Michelle大感他鄉遇故知：「好多香港人都話好難買飛，其中有一個觀眾話買唔到飛，爸爸都嚟唔到睇，下一場放映都已經滿座。」

早前佢同導演參加夏威夷國際電影節兼全球首映

導演與Michelle此行甫到步即晚就出席世界首映，雖然有時差，不過導演就話：「夏威夷嘅日落好靚，所以喺酒店望出去不停影相，冇特別休息，影到開始天黑就開始預備好心情，出發同觀眾交流。」
Michelle嘅演出仲獲觀眾大讚

電影放映後觀眾掌聲此起彼落，導演同Michelle逐一同觀眾合照交流。有觀眾仲大讚Michelle成功駕馭《破·地獄》角色，演出達影后水平咁話。