StarTalk一氣呵成版｜張家輝對演出欲求不滿 希望演飾更多不同角色

張家輝 近年不斷於電影中挑戰自己體能極限，於新戲《重生》中亦有大量動作場面，家輝就話自己近十幾年入面，所接拍嘅電影武打動作類係佔好大部分，至於講到原因，就要追溯到佢剛入行時，受成龍真跌真打嘅動作片所影響。家輝指自己剛接觸電影時就係呢個年代，雖然當時內心有驚慌，但就喺電影同電視劇中已經潛移默化地接受訓練，同時亦灌輸咗自己要懂得點打，令佢除咗對動作嘅觀感改變外，亦慢慢鍾意上動作戲。

張家輝 接受 王鎮泉《StarTalk》訪問。

雖然拍攝動作戲又攰又辛苦，甚至有時仲會受傷，但家輝指當作品面世時，睇到啲動作場面咁亮麗，又會覺得自己嘅付出係值得。

家輝從影以嚟演過唔少角色，但佢就喺《StarTalk》入面，就同 王鎮泉 坦言自己仲未夠喉，每每當睇到世界各地唔同嘅創作、劇本同角色，佢都會羨慕妒忌恨，不過家輝話雖然有啲嘢自己演唔到，但觀摩吓人哋嘅演出都係件好爽嘅事。

唔少動作戲都選擇親身上陣嘅家輝，佢話每次拍攝前都會衡量自己嘅膽量同應付嘅能力，家輝指好多時只要自己唔怕就會做到，但越怕就會越受傷，甚至有時仲會自己加動作。
張家輝坦言唔想畀角色定型。
好多熱愛演出嘅演員，都不得不面對會薪酬問題，唔少人更因為收入太低而轉行，家輝就話自己入行時雖然仲係影圈風光嘅年代，但作為剛入行嘅佢並非受惠者，佢指自己一直以嚟嘅薪酬算係OK，加上自己冇乜惡習唔會賭博，所以佢覺得自己唔係好有錢，但亦唔會缺錢。而每次工作家輝話唔會諗為自己增加幾多收入，而係諗點處理呢件事。家輝又分享自己對演繹角色嘅睇法，盡量唔畀自己以慣性去處理一個角色。

由喜劇改變戲路演出正劇，家輝坦言係唔想令自己有慣性，佢又提到自己演過嘅經典角色「化骨龍」，唔希望一直循環不息咁演同一個角色，因為咁樣無疑係一種折磨。除咗「化骨龍」外，家輝又指好似《証人》入面嘅殺手角色，雖然得到觀眾認同，但佢都唔希望被角色定型。