鄧麗欣西藏旅行登海拔5200米珠峰大本營生日前夕宣布明年3月紅館開演唱會

10月15號生日嘅鄧麗欣（Stephy）早前去西藏旅行，生日前夕就喺IG開心share成功挑戰海拔5,200米嘅珠穆朗瑪峰大本營，Stephy仲曬出素顏相，不少網民大讚係「顏值最高峰」，Stephy日前已回港。

鄧麗欣生日前夕就喺IG開心share成功挑戰海拔5,200米嘅珠穆朗瑪峰大本營。
Stephy仲曬出素顏相，不少網民大讚係「顏值最高峰」。鄧麗欣話要登上高峰，先要做好200分，準備不畏懼、勇往直前。Stephy茹素多年，皮膚及體態保持少女狀態。鄧麗欣曾分享凍齡保養秘訣，認為水份為最好的保養品，無論皮膚或身體都必需維持足夠的水份。

Stephy前日仲出席Fans Club特別為佢籌辦嘅生日會，逾百fans切蛋糕、唱生日歌、玩遊戲、分享追星點滴，Stephy更率先宣布明年三月紅館舉行首次個人演唱會作為「回禮」。
一向錫fans嘅Stephy喺台上眼泛淚光宣布明年開騷，台下fans立即興奮歡呼，不少歌迷感動抹眼淚。Stephy就話生日願望真係好簡單：「希望大家以最開心、最健康嘅身體嚟睇我嘅演唱會，嗌大聲啲！」

Stephy前日仲出席Fans Club特別為佢籌辦嘅生日會，逾百fans切蛋糕、唱生日歌、玩遊戲、分享追星點滴。
Stephy受訪時笑言以為忍得住啲眼淚，望住咁多位好熟悉嘅面孔，結果都係失守，佢希望所有fans都買到飛入場，約定大家紅館見。Stephy由19歲出道，唔少fans支持佢近十幾年，其實Stephy喺生日會fans分享環節，聽到歌迷嘅追星故事及見到大家嘅珍藏品已經好感動，Stephy不時眼紅紅強忍眼淚：「佢哋好多人都支持咗我十幾年，而我好細個入行，佔咗我人生超過一半時間，全部都同大家一齊度過。呢啲經歷得來不易，好值得珍惜。」

Stephy率先宣布明年三月紅館舉行首次個人演唱會作為「回禮」。
Stephy收到好多fans手造嘅生日禮物特別開心：「禮物不在乎價錢，最緊要係佢哋嘅心意，所以好多年之前佢哋已開始會親手整禮物畀我。今年Fans Club忡特別整咗一部扭卡機，所有扭卡得到嘅錢都捐去慈善機構。呢份禮物對我嚟講係最好，見大家排晒長龍，多謝大家落力參與。」Stephy更放入幾十張親筆簽名隱藏版畀fans驚喜。