中年好聲音3｜直擊海選試音幕後故事 4千人報名爭入最後百強

《中年好聲音3》經過新馬同大灣區嘅參加者進行連串激烈比試力爭入圍之後， 今晚一集將公開海選幕後情況同百強誕生過程。今季自6月舉行香港賽區招募，吸引逾4千人報名，經過四日海選同評審團決議後，當時初步選出約1千位新一批「中年好聲音」。

《中聲3》吸引逾4千人報名，海選足足進行4日時間
呢批「候選好聲音」當中有幾位甚具明星相，好似「林志穎2.0」任永健、「黑實李治廷」李創偉、「港版梁靜茹」霍露絲。追夢唔止要具備勇氣，亦需具備堅毅意志力，身為曾罹患癌症嘅三名參加者之一；現年40歲嘅土木工程師「林志穎 2.0」任永健，曾因接受電療、化療導致喉嚨乾涸，一度未能唱歌。經過多年運動同努力後情況先得以改善，佢話：「參加係為咗畀榜樣我個仔，教佢做人要努力堅持，唔好放棄。」
任永健被指同林志穎外型相似

追夢亦無分年齡，持拐杖參與嘅82歲婆婆賴群玉，係今季最年長嘅參加者，海選時佢一出場就獲張佳添讚美係雍容華貴嘅婆婆。賴婆婆曾喺非洲工作20年，逢大時大節便會獻聲唱歌；10年前退休返港後得悉患癌，儘管需撐拐杖仍努力站上舞台追夢，令人敬佩。
賴群玉婆婆係今屆最年長參加者

另一位同樣白髮斑斑、時尚型格嘅80歲婆婆羅秀蘭，指亡夫生前非常支持自己唱歌，故揀選對方最喜歡的《親密愛人》面試。

羅秀蘭婆婆已年逾80，不過睇落一啲都唔似

積極繼續追尋歌手夢嘅參加者今季繼續出現，好似2008年曾以男子組合 Square 出道嘅39歲 趙浚承，當年因星途平平一度離開樂壇甚至香港，轉移陣地到北京經營生意，期間未有放棄歌手夢，自資出歌。
Square前成員趙浚承已轉行從商，今屆決定參加再追夢

而36歲嘅侯靜伊係一名HiFi唱片歌手，海選時以青春牛仔look獻唱《初戀》，希望可以成為《中年好聲音》大家庭一份子。
侯靜伊係一名HiFi唱片歌手

至於其他參加者仲有現年50歲嘅蔡堅偉，佢仲係《聲夢傳奇》學員蔡愷穎(Lolita)嘅爸爸。海選當日Lolita一直陪伴為爸爸打氣，仲大讚爸爸表現100分：「唔係唱開歌嘅人，又冇學過唱歌，夠膽參加已經好叻！」蔡堅偉指參賽係為鼓勵二女同細仔、繼承家姐衣缽參加《聲夢3》。
Lolita嘅爸爸蔡堅偉係乖女陪伴下參加海選

而自封為「中年好司機」嘅劉建偉睇落幽默風趣，但係佢分享嘅動容故事就令美女評審海兒落淚，劉建偉話：「我唱《千億個夜晚》係紀念太太，兩年前因一個意外離世。」伍仲衡直言：「我唔撳(鐘仔)係因為知道你太太聽緊。」
劉建偉嘅故事同表現都令人印象深刻

海兒當時仲因為感觸而落淚

至於36歲嘅羅逸軒，就指係為90多歲嘅《中年好聲音》忠粉嫲嫲參加，因祖母對生命感到消 極，希望秘密參加送嫲嫲驚喜：「如果佢睇《中年好聲音》見到係佢個孫，會更加正！總之呢個比賽行到幾遠得幾遠，我都想畀啲動力佢。」

《中年好聲音3之百強誕生》今晚 20:30 翡翠台