張敬軒年內3度澳門騷唱足30場破紀錄 被Fans激到走心狂叫：你7街瞓！

張敬軒嘅 《PRIME CLASSICS LIVE 2024澳門演唱會》星期五晚再喺澳門展開，加上早前嘅演出，今年軒公喺澳門前後足足唱爆30場，仲破埋當地演唱會史上紀錄。

張敬軒一年內第三度於澳門開騷，場數更打破當地紀錄

雖然日前搞出要主唱者親身出面向大家求飛嘅大頭佛，不過今次話晒係演唱會嘅第三章，軒仔一早準備5套全新歌衫演出，當中一套全黑連身衫，設計靈感仲係來自佢本人：「服裝設計師問想有套咩衫？』我話可唔可以好似睡衣咁，我喺屋企真係咁樣着，但唔係咁閃嘅，我係鍾意着啲好貼身或者咁樣飄吓飄吓嘅衫。我係嗰啲quite elegant，好低調嘅華麗，點知佢又整咗呢件有4萬幾粒水晶嘅衫俾我。」而Opening嘅閃石開胸西裝，更係7萬粒水晶釘裝而成、重量超過40磅。

今次歌單亦大幅度調整，佢指有6成以上作品都係新出現，包括陳慧琳《風花雪》、楊千嬅《少女的祈禱》、吳雨霏《我本人》、陳慧嫻《夜機》、彭羚《漩渦》、蔡玲玲《細水長流》同葉德嫻《不捨也為愛》等。

軒仔呢場又分享唔少童年往事：「細個媽咪開咗一間卡拉OK，我逢星期五晚都會有自己一個嘅表演時間，陳慧嫻小姐89年嘅告別演唱會係我嘅表演節目，我可以成個演唱會由opening唱到ending為止，為我奠定咗音樂基礎，最神奇就係冇諗過今時今日我哋係同屬一間唱片公司，慧嫻姐姐就嚟開演唱會啦，希望大家都會多多支持，我而家爭取可唔可以去做嘉賓。」隨後即獻唱陳慧嫻嘅《夜機》。
佢仲提到年幼時已習慣一個人自己同自己玩，更可以話非常享受

之後佢又話：「去到2000年我阿媽開咗間麻雀館，我阿媽專做嗰啲嘢㗎，冇賭牌咋，有賭牌佢都應該開賭場㗎，我阿媽好鍾意玩兩手，所以我又喺麻雀館做過。」

因為係獨生子，軒仔笑言鍾意自己玩，亦坦言享受自己一個人嘅生活：「大家見到今日喺舞台上面嘅張敬軒，其實係一個好複雜嘅人，我都冇辦法去解釋。我覺得自己好似個城堡，有好多個窿，有好多間房，每一間房都裝咗唔同嘅嘢，有啲裝開心；有啲有本小氣簿記住邊個對我唔好我就會寫喺入面，哈哈；有啲永遠向人敞開；有啲房間鎖咗門之後連自己都唔俾入去，我哋每一個人都係一個複雜嘅結構，都係一個有好多間房嘅城堡，所以喺呢個城堡入面究竟係一個廢墟？定係一個屬於自己先至可以悠然自得嘅遊樂場呢？其實都係我哋自己決定。」
軒仔同監製仲特意為歌迷重現年前香港演出嘅佈置，認為可以為疫情時大受影響嘅大家還心願

呢晚演出重現年前紅館show《俏郎君》波波裝置，係軒仔同演唱會監製莊少榮特別安排，當時因為疫情，除外地歌迷未能到港睇show，亦因為香港限聚令部份歌迷亦未能入場：「疫情呢幾年，除咗犧牲咗我哋生活上嘅好多習慣，亦都令到我哋同好多嘅朋友分隔得好遠好遠，尤其今晚在場嘅一啲朋友，喺疫情未能嚟香港睇我嘅兩個非常非常重要嘅演唱會，《盛樂》同埋我自己20周年嘅演唱會。所以我諗咗好耐，我好希望藉住呢個場地，可以將一啲好難忘嘅瞬間、好多嘅想法同表演、當中嘅一啲moment，今晚呈現俾大家。」
軒仔同歌迷之間可以話係愛恨交纏，呢晚又現場開戰喇

雖然開騷前軒仔喺社交平台提示「睇show的禮儀」，現場大家亦非常遵守，「今晚好開心，可能汲取咗去年嘅教訓，冇人大嗌、冇人亂講嘢……」點知一轉頭歌迷就百厭同佢互相傷害：「佢係咪嗌除衫？老公？你周街嗌人老公嘅咩？你兩條友如果再係咁嗌，我真係發嬲俾你睇！」而歌迷仲起哄叫好，軒仔就話：「嗱，你哋拎起電話，我錄一段俾你哋返屋企留念，你哋想睇張敬軒鬧人吖嘛，呢期好Hit㗎呢句，『你7街瞓！』喺自己演唱會度着到咁靚，用鄉音叫人你7街瞓…… 唉！」搞到全場即時爆笑。