Twins下月展開海外巡演 阿嬌考慮英國站搞聖誕特別場

Twins第13場內地巡迴演唱會20號晚於佛山圓滿結束，而下月起佢哋將會到倫敦、溫哥華、多倫多、拉斯維加斯等地展開世界巡迴演唱會。
Twins內地巡迴演唱會圓滿結束。
由於前晚係Twins於內地最後一場演唱會，所以歌迷特們都相當不捨，由開場第一首歌起，就已經企晒起身同Twins一齊又跳又唱，到完場都唔捨得離開。完成第一部份快歌後，阿嬌 鍾欣潼 就已經被感動到眼濕濕：「嘩！咩事，一出嚟就已經想喊。」每當佢哋唱到經典金曲時，歌迷們都會齊齊大合唱，直到完場前全場大合唱《風箏與風》，阿Sa 蔡卓妍 同 阿嬌再忍唔住要不斷抹眼淚。
阿嬌畀歌迷們感動到喊。尾場兩人不停落淚。
香港演唱會頭場撞正阿嬌生日，阿Sa就叫全場觀眾以唔同顏色嘅生日牌為對方慶生，而內地尾場阿嬌亦以驚喜回禮，為阿Sa印好「蔡卓妍生日快樂」嘅橫幅，叫全場萬多名觀眾一同高舉，同時又為阿Sa唱生日歌；身為主角嘅阿Sa感動表示：「嘩，咁早慶祝生日....好感動，我爸爸同埋我隻貓呢，都係就快生日，佢兩個都係10月23號生日，咁大家不如送個祝福畀佢哋啦，我爸爸坐係邊呀？生日快樂呀！」
Twins下月將會展開海外巡迴演出。每次唱到經理歌時，歌迷們都會一齊大合唱。
為咗即將展開嘅國外巡演，阿Sa話已經特別訂製了Twins專屬嘅行李帶畀所有工作人員，同時佢又非常期待去加拿大睇尼瓜拉瓜大暴布，提到加拿大站舉行時正係佢嘅生日，阿Sa指當地嘅朋友已經準備好晒為佢慶祝。
歌迷們個個都高舉點唱紙牌。Twins嚟緊要去加拿大演出。
由於冬天嘅加拿大特別凍，而阿Sa、阿嬌都坦係怕凍之人，所以佢哋已經準備帶最厚嘅羽絨同行，阿Sa仲話已經學識自己整「穿載甲」，到時可以幫阿嬌做埋。阿嬌就話最希望去睇羚羊峽谷，貪玩嘅阿Sa就提議搞個團畀歌迷報名，到時一齊去睇演唱會同參觀景點。
阿Sa期待去加拿大睇尼瓜拉瓜大暴布。阿Sa又建議搞個旅行團，同fans一齊去睇景點。
至於問到英國站時會唔會約黃偉文Wyman見下面？阿SA就笑道：「佢對『多謝失禁』，『愛情當入土』好有興趣，哈哈，見面一定同佢踱下。」阿嬌就表示自己第一次喺英國過聖誕，所以佢考慮喺演唱會上整個聖誕特別版演出：「海外場冇依家咁大，同觀眾距離好近，應該會更加開心，或者可以叫佢哋再扮返Twins造形入場，或者扮聖誕樹，我哋可以揀最佳衣著，著得勁嗰個一樣有大獎。」阿Sa亦開心和應，指希望到時可以同英國嘅歌迷，過一個快樂聖誕。
阿嬌提議喺英國站搞個聖誕特別場。