JW吉吉慈善騷前遇感冒來襲 Hubert爆坤哥Cap帽下暗藏全新髮型

JW王灝兒 周吉佩 胡鴻鈞 吳業坤 同應屆港姐冠、亞軍 倪樂琳 同 梁嘉莹 ，呢日出席《善心滿載仁愛堂》記者會，各人會喺10月26號晚各展所長籌款，但係兩位唱將JW同吉吉喺騷前就遇到同一個問題，被感冒菌來襲，聲線狀況唔穩定。

JW同吉吉近日不約而同受感冒困擾
JW希望儘快痊癒，因為表演係佢同幕後研究咗一段時間嘅成果，希望同聲夢學員一齊以Live House形式演出。

雖然JW受病菌困擾，但係當主播潘盈慧讚佢靚咗唔少，就即時心花怒放，仲話自己專注生意同開始教學生唱歌，生活充實自然容光煥發。JW五月時宣布同男友分手結束6年情，被問有冇追求者，佢就話順其自然。
JW指因為自己生活非常充實，所以就容光煥發咁話

坤哥呢日以Cap帽上陣，好兄弟Hubert大爆對方喺慈善騷上會以好爆嘅髮型上陣送驚喜，叫大家拭目以待。
將合作開騷嘅Hubert，大爆坤哥將會以新形象同大家見面

今屆嘅友誼小姐 王汛文 選美後瞬即加入《東張》主持行列，雖然倪樂琳同梁嘉莹因為有唔少港姐任務在身，唔可以咁快加入劇組或拍攝節目，但係呢次兩人首次參與慈善大騷，佢哋都好期待咁難得嘅機會，熱愛小動物嘅梁嘉莹更希望未來為狗狗嘅公益活動出一分力。
應屆港姐冠、亞軍倪樂琳同梁嘉莹呢日都有現身記者會

潘靜文同孔德賢擔任今次慈善騷嘅大會司儀，兩位先後累積咗做大型直播騷嘅司儀經驗，佢都話希望每次都有所進步，孔德賢表示每次一收到講稿，就會咪熟特別名詞，希望呈現一個專業嘅感覺。