許冠文新片比喻香港現況 黃子華笑稱香港需要輪迴

由兩大喜劇天王許冠文及黃子華主演嘅新戲呢日舉行首映，兩位主角聯同電影公司老闆楊受成夫婦、導演陳茂賢、衛詩雅、周家怡、朱柏康、韋羅莎、梁雍婷、鍾雪瑩，以及為電影獻唱主題曲嘅林家謙都有出席。

許冠文同黃子華兩大喜劇演員合作嘅新片首映
電影以香港殯葬業嘅傳統文化為主題，優先場上映後好評不斷，好多人睇完後都話好催淚，不過Michael反而用喜劇嚟定義呢套戲，仲話大家喺戲院喊完，離場時會覺得個人生靚咗，生命係值得活下去，明天會更好，Michael指喺呢個角度嚟睇，雖然全片都有笑話，但係會係新派嘅喜劇，佢仲話相信未來嘅喜劇都會係咁。

不過以生死作主軸嘅新片，恐怕唔係人人笑得出

Michael表示自己當初睇劇本時已經忍唔住喊，但喊完後又覺得好舒服，原因係睇完後自己釋懷咗、將執着放低咗，有一種大膽重新上路去做人嘅感覺，同時Michael亦希望藉住呢套戲，將釋懷嘅感覺帶畀香港市民：「香港而家面對緊幾困難嘅環境，需要尋找新嘅方向，呢個新嘅方向就係需要香港人放低晒所有嘅執着、所有憂慮同以前嘅驕傲重新上路，而家香港700萬人都需要破地獄。」子華亦指未來嘅大時大節除咗放煙花外，亦建議喺維港嘅中心破地獄，笑言香港需要輪迴。
Michael指整個香港700萬人都需要破地獄嘅覺悟

戲中飾演喃嚤師傅嘅Michael，拍攝前專登去拜師學唱南音，而喺訪問時佢就同子華一齊合唱，仲透過歌詞嚟同大家分享道理。
衛詩雅戲中嘅表現被大讚

衛詩雅同朱柏康喺戲中飾演Michael嘅子女，非常緊張觀眾觀後感嘅衛詩雅，坦言每之謝票時都會緊張到胃痛，而朱柏康指過往好少會睇返自己演出嘅作品，不過今次呢齣電影，自己就好想入場睇。周家怡就帶埋毛巾嚟睇首映，佢仲呼籲入場嘅觀眾都需要帶定毛巾呀。

戲劇界猛將朱康同韋羅莎亦助陣新片