StarTalk一氣呵成版｜Liza姐下月再踏紅館舞台 與年青一輩合作反低沉氣氛

汪明荃 相隔7年，即將再喺紅館再開個人演唱會，近日不斷接受唔同訪問，適應唔同方式宣傳一樣柔韌有餘嘅Liza姐，呢日接受 王鎮泉 《StarTalk》專訪，就提到原本希望每隔5年就踏上紅館舞台一次，無奈中間因為疫情同紅館太搶手，所以就順延喇。

Liza姐11月就會再踏紅館開騷
近年市道同氣氛都低沉，Liza姐就希望為大家提供少少娛樂，等大家都可以尋回一啲輕鬆開心時刻喇。為演唱會推出嘅新歌《Make My Day》近日各大媒體都播不停，而創作者亦都係年青一輩，好似作曲嘅 林家謙 仲有 填詞嘅 黃偉文 ，兩者都係首次同阿姐合作。

阿姐仲大讚家謙才華陽溢，更獲對方首肯合作，而Wyman更早喺30年前已經約定，當年Wyman邀請阿姐擔任節目嘉賓，當時尚係新人嘅Wyman非常感謝阿姐出手協助，仲做足5集嘉賓，仲應承一定要為阿姐填詞作報答，結果到今次終於成事。
新歌《Make My Day》同年青一輩音樂人合作

阿姐仲爆出當年Wyman初入填詞界，曾被黃媽媽嫌棄，仲問佢有冇為阿姐填詞嚟作為阿仔事業成功與否嘅門檻，直到今次合作，可以話係完成Wyman喺媽咪心中可以稱為一名出色詞人嘅心願喇。
同Wyman嘅30年約定齊終於成真

除咗家謙同Wyman，演唱會幕後陣容亦都非常強大，好似音樂監制有 趙曾熹 排舞就由 Sunny Wong 負責。至於歌單方面，Liza姐指原本打算演唱部份別人的歌，但係後來因為歌單實在太豐富，所以最後無奈忍痛放棄，全部都由自己過往名曲中精選而成。

時下年青歌手，人人開騷都話要操肌Keep Fit，原來阿姐一樣有呢個煩惱，所以要勤力做Gym希望纖減身形，加上要普拉堤訓練，而飲食同樣要控制。
唔少人都期望一直非常恩愛嘅佢同丈夫 羅家英 同台，Liza姐就指大家今次如願成真喇，因為英哥將負責串連演出唔同部份，仲爆家英哥會負責講嘢非常開心，但係就控制唔到佢會講咩內容咁話喎。
家英哥於演唱會亦有一重要角色

除咗開個唱之外，Liza姐亦將再次演出劇集，久違現身嘅佢，將扮演一名女企業家。而佢另一個重點興趣粵劇演出，大家就要等到明年底，佢先會再同家英哥再合作登台，重演《大鼻子情聖》喇。

完騷之後阿姐將久違再拍新劇