劉德華巡迴KL站4場結束 為姜皓文夫婦送生日結婚祝賀

被當地歌迷笑稱為「大馬女婿」嘅 劉德華 ，完成吉隆坡站4場巡迴演出，身處當地嘅 姜皓文 夫婦亦現場睇騷，作為夫婦生日同結婚紀念嘅慶祝活動，意猶未盡嘅佢哋仲還期待香港站再入場欣賞。而大馬觀眾嘅熱情，仲令華仔大讚係Fans中嘅天花板咁話。 10月份係 黑仔夫婦嘅慶祝月；因為太太殷寧24號生日、25號就係佢哋結婚周年，緊接26號就係黑仔生日；所以27號華仔演唱會，就成為佢哋最大嘅慶祝節目喇。

身處大馬嘅黑哥同太太入場欣賞華仔演出

華仔仲特別為佢送上歌曲慶祝生日同銀婚
華仔喺演唱會，仲為佢哋分別送上《暗裡著迷》同《心肝寶貝》作為黑仔同太太嘅生日同結婚周年禮物，又同其他觀眾一齊合唱生日歌，令黑仔同太太對呢份心意既驚喜又興奮。 黑仔話：「能夠睇到華哥嘅演唱會，已經係今年好大嘅生日禮物，我都係第一次喺馬來西亞睇演唱會，冇諗到驚喜陸續有來，《暗裡著迷》係我鍾意聽嘅華哥歌曲之一，仲要整多首《心肝寶貝》祝賀我同太太結婚紀念，實在好感恩，感謝華哥的所有祝福！其實睇住華哥又唱又跳，佢嘅魄力令我好佩服。睇完呢個演唱會覺得睇一次唔夠，希望喺香港站再睇一次。」

黑哥指睇一次唔夠喉，等香港站演出一定要再入場呀
完成大馬演出之後，星期四華仔就將移師台北小巨蛋舉行4場演出，相隔11年再次攻蛋，同久違嘅台灣歌迷見面。