中年好聲音3丨豬農胡家健被封溫柔殺手陳芷盈獲讚有王菀之影子

逢星期日播出嘅《中年好聲音3》，27號晚播出首集香港賽區賽事，並誕生出五位5燈直接晉級選手，當中包括經歷過愛妻意外身亡兼生意失敗嘅「中年好司機」劉建偉，同獻唱《李香蘭》嘅英國人Dan James，而「中3王菀之」陳芷盈、「豬農」胡家健、「顏志恒師弟」張家豪，以及嚟自雲南嘅劉洋，表現都相當亮眼。
陳芷盈被封「中3王菀之」。
被車婉婉封為「中3王菀之」嘅 38 歲陳芷盈，報稱音樂機構執行主任，佢以《有了你》一曲作賽，無論聲線、容貌都同真．王菀之有幾分相似，難怪毫無懸念成首位 5 燈直接晉級選手。評審們對陳芷盈表現有讚無彈，張佳添表示：「好有王菀之影子，唔單止有佢嘅聲線，仲有佢嘅音樂感喺裡面，呢個好難得。呢種音樂節奏冇音樂感會唱到好平淡，聽咗咁多個，你暫時係喉嚨最鬆嘅一個。」周國豐亦高舉姆指大讚：「表情同聲音帶到好快樂感覺，始終陳百強版本太經典，鋼琴聲種唯美好難取替，你同音樂總監諗到咁樣打破框架係一件好高明嘅事。」
胡家健繼承父母衣缽打理養豬場。
繼承父母衣缽打理養豬場嘅53歲胡家健，由於自細就喺養豬場成長，所以佢以「不可分割」嚟形容同豬嘅關係，佢指有時見到母豬難產痛到流眼淚，自己見到都會心痛。胡家健每早風雨不改5點鐘就起身工作，因為人手問題已經有 4 年無放過假休，平日就係靠唱歌嚟減壓，仲指豬豬就係佢嘅特別聽眾。呢位「有笑有淚養豬人」胡家健選唱《眼淚為你流》作賽，周國豐點評時就指佢係一位好溫柔嘅殺手，笑言如果佢對住啲豬唱呢首歌，啲豬都會死得好甘心。胡家健以「不可分割」嚟形容同豬嘅關係。
38歲張家豪唔只係顏志恒嘅中學師弟，佢仲同顏志恒一樣任職西餐廚師。選唱《怎麼捨得你》嘅張家豪，一開聲即成功冧倒肥媽，而美女女高音海兒亦激讚：「Bravo！暫時我最鍾意嘅一個表演，各方面做得非常之好。」伍仲衡則笑問點解佢同顏志恒都係廚師，但係身形爭咁遠。
顏志恒嘅中學師弟張家豪。
而嚟自雲南嘅火鍋店老闆 42歲嘅劉洋，獻唱《默》獲周國豐大讚懂得透過歌聲講故事：「我認識那英嘅版本、張惠妹嘅版本，本來是一首很暗黑嘅歌，就是說世界沒有你，變得沒有顏色、聲音，我覺得你的感覺抓得非常的好。」
嚟自雲南嘅火鍋店老闆 42歲嘅劉洋。曾參加第十屆新秀歌唱比賽嘅高正洋。
此外，仲有兩位 4 燈唱將值得關注，分別係 55 歲直播博主高正洋、同嚟自加拿大嘅 36歲地產經紀梁楚琪。曾參加第十屆新秀歌唱比賽嘅高正洋，獲新秀出身嘅車婉婉稱呼做「正洋師兄」之餘，仲即場與同屆參加新秀嘅周國豐「相認」，周國豐話：「因為呢個節目，有網民摷返我同高正洋合唱嘅《沒有你之後》片段。」至於獻唱《七級半地震》嘅梁楚琪，就獲海兒同張佳添大讚台風、肢體動作及力量感十足，完美運用舞台。

《中年好聲音3》逢星期日 20:30 翡翠台
嚟自加拿大嘅 36歲地產經紀梁楚琪。