《焚城》《破．地獄》套票周五限量發售 $120盡睇兩部本地突破新作

經濟不景，電影市場亦受市道低迷影響，而兩部重磅港產電影《焚城》同《破．地獄》嘅出品公司安樂影片同英皇電影，將推出1000套限量電影套票，令影迷可以同時支持呢兩部香港電影，正式可以話係一張票睇到笑。

WhatsApp Image 2024-10-30 at 12.40.26.jpeg
售價為120蚊嘅《焚城》加《破．地獄》套票，星期五(11月1號)中午，於英皇戲院銅鑼灣時代廣場、英皇戲院Plus+大圍圍方、百老匯MY CINEMA YOHO MALL，及百老匯GALA CINEMA(朗豪坊)4間指定戲院發售，套票可於各英皇同百老匯戲院使用。

《焚城》出品人兼監製江志強稱：「電影市道的確低迷，但我相信只要電影人拍出好作品，觀眾一定會入戲院欣賞。《焚城》係香港第一部災難鉅作，《破．地獄》則罕見以殯儀業題材為背景，一文一武。兩部作品都銳意為香港電影開闢新天地。哪怕只能引領香港電影行前一小步，我哋每次都會傾盡全力。」

《焚城》以香港發生嚴重核事故作背景

劉德華扮演故事中嘅環保專家
而英皇電影營運總監兼《破．地獄》聯合監製邱漢雄就提到：「我哋對呢次合作充滿期待，亦相信會為香港電影業注入全新活力。《破．地獄》以殯儀業作為背景，呈現香港獨有嘅文化遺產，同對生命、死亡提出思考，而《焚城》就為港產片開拓災難題材，為觀眾帶嚟新鮮感。兩部電影當中豐富嘅題材同深刻情感，希望可以喚醒大家對香港電影嘅熱愛，入戲院支持港產片，攜手推動香港電影業復興。」
《破．地獄》中兩大笑匠合作，未上映已令人非常期待

其實兩部電影背後創作團隊緊密相連，《焚城》嘅導演潘耀明，同時係《破．地獄》攝影指導，兩片視覺效果上有住相輔相成嘅風格。潘耀明話：「無論《焚城》嘅緊張災難場面，定係《破．地獄》嘅細膩情感，我都希望透過畫面令觀眾更震撼同感動，好幸運我有份參與呢兩部作品，視覺上我都盡力展現佢哋嘅獨特風格，希望觀眾更容易投入兩部電影當中，《焚城》同《破．地獄》都係香港電影人心血之作，希望大家感受到我哋嘅熱誠同努力。」
許冠文扮演嘅殯葬師傅，看透人生來與去

正身處日本參加東京國際電影節嘅《破．地獄》導演陳茂賢則指：「我認為呢次《破．地獄》同《焚城》合作唔止係聯合宣傳，而係兩種創作語言嘅交流。電影對我嚟講，唔單止係一種講故事方式，仲係同觀眾深層溝通嘅藝術。希望呢次合作透過兩部電影嘅聯合，展現出更廣闊嘅視野，啟發觀眾多角度思考生命同文化、人與城市之間嘅聯繫。同時都希望可以喚起更多觀眾對港產片嘅興趣同支持。」