劉德華相隔11年再開台灣演唱會 撞正颱風襲寶島恐影響開騷

劉德華一連四場嘅世界巡迴演唱會台灣站原定10月31號開鑼，呢次更係華仔相隔11年再到寶島開騷，由官宣一刻已經貼燃台灣華迷嘅高度期待。加上呢次售票採取預先登記抽選制度，共計84萬人次登記狂搶約4萬張門票，整體中籤機率只係低於5%，令大家嘅熱情喺賣飛時已令華仔感動不已，仲承諾：「我會以最誠摯的舞台呈現給大家」。

時隔11年再於台灣開唱嘅劉德華，估唔到可能被秋颱康妮影響演出

可惜華仔呢次開騷撞正颱風康妮迫近台灣，令大家都好擔心演唱會演出會受影響，而主辦單位30號就回應：「目前沒有相關的通知。」據了解華仔已經喺10月29號晚低調抵達當地，今日(30號)就會到小巨蛋綵排，但如果台北市屆時宣布停工停課，台北小巨蛋亦會關閉，華仔可唔可以順利開騷，就要等今晚8點台北市政府公告喇。

香港天文台預計康妮將大幅度影響台灣

受康芮影響嘅仲有以五月天為首，率領劉若英、蘇慧倫、Energy、BOOM ！怪物星人、告五人、家家，等，總共14組旗下歌手喺高雄、花蓮展開嘅一連三日慈善演唱會。五月天所屬公司29號宣布：「為確保共襄盛舉的觀眾與台前幕後工作及演出人員之安全，經審慎評估後決定延期舉辦『一路向東』三天演出，延期演出相關事宜將另行儘速公告。」並呼籲歌迷注意防風措施。

五月天同告五人嘅慈善演唱會早前已宣佈延期

#劉德華 #台灣 #演唱會 #小巨蛋 #寶島 #五月天 #怪物星人 #劉若英 #家家 #Energy #蘇慧倫 #一路向東 #JustLoveIt #花蓮 #高雄 #慈善 #演唱會 #颱風 #康芮