台慶宣傳片丨朱敏瀚與陳曉華傳婚訊笑指人情照收 劉穎鏇盡現活力運動細胞

嚟梗19號就係TVB台慶嘅大日子，一眾藝員為台慶拍攝宣傳片，着白西裝嘅朱敏瀚喺中環取景，講到台慶表演節目，佢提議加入數碼元素，令唱歌跳舞環節配合數碼視覺效果。

朱仔話自從傳出婚訊消息，收到好多人祝福。
問到會否介意同早前傳婚訊嘅陳曉華（Hera）孖住演出？朱仔大方話做工作夥伴都可以，朱仔仲話自從傳出婚訊消息，收到好多人祝福，朱仔笑指：「人情可以照畀，但係唔係（結婚）。」至於追問佢媽咪有冇見過Hera，朱仔就尷尬笑住話：「唔知呀！」

王嘉慧、李旻芳、何沛珈同梁菁琳喺鬧市街頭拍攝。
同樣喺街頭取景嘅仲有王嘉慧、李旻芳、何沛珈同梁菁琳四位東張女神，為咗盡現佢哋平時四出採訪畫面，四位靚女要喺鬧市街頭拍攝，期間仲要不時避車同途人。至於喺廠拍攝嘅就有劉穎鏇（Tiffany）同出爐港姐冠軍倪樂琳（Ellyn），Tiffany喺宣傳片中盡現活力運動一面，佢大讚導演同製作團隊好有創意，因為成個拍攝環境結合咗現代同科幻世界，佢好期待睇製成品。

Tiffany喺宣傳片中盡現活力運動一面，佢大讚導演同製作團隊好有創意。
至於首次參與台慶宣傳片拍攝嘅Ellyn，喺鏡頭前展現舞姿，佢話心情既開心又緊張，因為冇諗過以藝員身份參與拍攝，首次拍攝跳舞宣傳片就緊張到失眠。

首次參與台慶宣傳片拍攝嘅Ellyn，喺鏡頭前展現舞姿。