鍾柔美為港菲友誼賽任表演嘉賓 網民獻計為賽事列出嘉賓名單

今個月14號中國香港足球總會將會舉行國際友誼賽，屆時主場港隊將會對賽菲律賓，而為隆重其事，足總就邀請到港菲混血兒 鍾柔美Yumi 為賽事擔任中場表演嘉賓。
足總公布邀請到Yumi為港菲賽事擔任表演嘉賓。
今日（3號）足總喺社交平台公布消息，並post出Yumi任表演嘉賓嘅海報，於帖文中表示：「𝙔𝙪𝙢𝙞 𝙬𝙞𝙡𝙡 𝙗𝙚 𝙤𝙪𝙧 𝙨𝙥𝙚𝙘𝙞𝙖𝙡 𝙜𝙪𝙚𝙨𝙩 𝙥𝙚𝙧𝙛𝙤𝙧𝙢𝙚𝙧!  🌟🌟嚟緊主場港隊對菲律賓嘅賽事中，我哋邀請到歌手鍾柔美（Yumi）擔任中場表演嘉賓！大家唔好錯過呢場精彩演出！非常感激菲律賓領事館及東盟協會嘅支持。」而Yumi亦於IG嘅限時動態轉發消息，仲寫住：「Let’s go!!🙌🏼」叫大家支持。
Yumi亦有轉發消息。
消息一出除咗令一眾米粉（Yumi fans稱號）興奮外，唔少球迷都讚足總嘅marketing識諗，搵歌手幫手暖場，順便推廣一下足球賽事，亦有球迷出謀獻計，提議如果將來有其賽事，可以邀請嘅嘉賓名單，例如港隊對賽馬來西亞的話，可以搵林明禎擔任嘉賓、港隊VS泰國，就可以搵鄺玲玲、省港盃就可以邀請張敬軒等。