破．地獄｜東京國際電影節放映反應熱烈 故事演員深受日本觀眾歡迎

由 陳茂賢 執導 兼有份編劇； 許冠文 黃子華 衛詩雅 朱栢康 同 周家怡 領銜主演，以傳統喪葬儀式作主題嘅話題新片《破．地獄》下星期就正式上映。導演陳茂賢加上子華、Michael、Michelle同朱康，近日一齊參與東京國際電影節嘅分享會同交流活動。

《破．地獄》團隊一齊參加東京國際電影節嗁「香港之夜」活動

子華同Michael今次係相隔32年後再度合作，兩人出席連日映後分享會同唔同觀眾交流，子華完成行程後就指：「我覺得一套電影能夠走出香港都唔容易。呢次喺東京睇到觀眾朋友嘅反應好好，覺得好安樂好幸運。希望可以拍多啲戲，比全世界都欣賞到。」
今次係子華同Michael多年來再次合作

而Michael就希望觀眾入場支持《破·地獄》：「今次好興奮，可以跟《破·地獄》團隊參加東京國際電影節，亞洲各地嘅業內同影評人反應唔錯，亦見到香港政府大力幫助電影行業，至於電影最終成唔成功，就睇作品嘅實力同質量，希望吸引多啲觀眾入場支持！」 

佢希望好嘅電影能夠吸引更多觀眾入場支持

女主角衛詩雅繼上月飛往夏威夷出席《破．地獄》世界首映後，今次再代表出席國際級大型影展，佢就透露特別珍惜同團隊成員相處喇：「呢個東京之旅係非常之開心難忘又緊張。開心係我覺得好榮幸能夠帶《破．地獄》同成個團隊嚟東京國際電影節，覺得非常榮幸，好似帶住一個香港嘅傳統、一個非物質文化遺產去畀世界各地更多人去認識。最深刻當然唔少我哋團隊成日一齊聚埋，仲要一齊踏上紅地氈。

早前代表電影飛往夏威夷嘅Michelle，仲深受兩大巨匠照顧
Michelle仲大爆深得兩位前輩呵護：「行紅地毯時天氣比較凍，為咗靚揀條靚啲嘅裙，子華神一個好細心嘅舉動令我好感動，準備行紅地毯之前，子華神俾咗件佢自己身上件西裝褸我披一披，又有戲中爸爸Michael神一齊行紅地毯，感覺加倍榮幸。」 

片中Michael係爸爸、朱康則係哥哥、Michelle係細妹

雖然朱栢康因工作關係，開幕紅地氈上未見蹤影，不過佢完成工作後即趕抵東京，加入團隊出席唔同分享會，朱康話：「非常榮幸同驕傲代表《破．地獄》同團隊一齊參與，可以同觀眾交流，呢件事非常鼓舞。當地觀眾反應好正面，好尊重我哋嘅作品，亦都好珍惜每一次喺東京同團隊或者同業交流嘅機會，希望能夠代表香港電影再有機會去唔同地方。」 

導演期望將更好嘅電影故事帶俾觀眾欣賞

而導演陳茂賢就認為東京之行意義重大，亦深深感受到日本觀眾嘅熱情：「能夠將好代表到香港嘅《破．地獄》帶嚟東京國際電影節，仲一齊參與創意香港嘅節目，非常感恩感受到日本觀眾嘅熱情，聽到佢哋分享對香港文化嘅興趣同演員嘅喜愛，好榮幸同興奮。之後《破．地獄》會返到香港，準備正式同觀眾見面，希望《破．地獄》可以繼續走遍世界，將香港電影帶俾各地觀眾，如是我信。」

電影公司於開畫日舉行活動，觀眾有機會得到限量紀念品