吳若希為４歲阿仔慶祝生日 盼Kylian成為有責任感嘅男孩

吳若希（Jinny）與老公何兆鴻（Alex）喺2017年結婚，育有一子一女，噚日吳若希為阿仔何少弘（Kylian）舉行生日派對，阿仔今年要求以蜘蛛俠作為生日主題，邀請咗一班朋友仔出席。

噚日吳若希為阿仔Kylian舉行生日派對。
吳若希今日喺社交平台貼出阿仔嘅生日會相，並寫道：「Happy Birthday 搏啜既人！我成日都同其他人講，你好似我！ 但係大家見到你對眼，都話你比較似爸爸⋯ 其實搏啜嘅人撇除對眼之外， 面形、反應、笑點～都係似我多啲，你哋睇吓佢對笑笑眼先啦！」

吳若希有啲唔捨得阿仔大得咁快，又指阿仔而家變咗瘦B。
吳若希有啲唔捨得阿仔大得咁快，又指阿仔而家變咗瘦B：「話咁快就四歲啦， 明明之前見到你仲係好大嚿肉，點解最近瘦咗咁多？長咗咁多？ 希望你繼續開心地成長， 繼續錫身邊嘅人， 將來成為一個有承擔有責任感嘅男孩。」雖然吳若希以「搏啜」呢個綽號稱呼阿仔，不過佢對阿仔係流露出滿滿嘅愛！

吳若希與老公Alex喺2017年結婚，育有一子一女。