張艾嘉因周潤發愛上跑步 與馮允謙劉偉恒為G6K籌款

世界宣明會先後喺美國及韓國舉行全球性籌款活動「Global 6K for Water」，為缺水社區水利工作籌款。而下月8日呢個籌款活動亦將於香港舉行，首屆更邀請到影后張艾嘉、馮允謙（Jay Fung）及導演劉偉恒擔任活動大使。
首屆更邀請到影后張艾嘉、馮允謙（Jay Fung）及導演劉偉恒擔任活動大使。
以前經常會同宣明會去唔同地方探訪嘅張姐，首次以跑者身份為宣明會活動籌款，提起當初開始跑步嘅原因，張姐指係同好友周潤發有關：「自從COVID之後，周潤發就約我去跑步，開頭我真係跑唔郁，3分鐘我已經就嚟死，不過佢話我知跑步就係需要一種毅力，就係要慢慢練，唔可以停，要繼續跑。喺跑步中間，我得到好多樂趣同埋搵返啲健康。」
張姐指自己因為發哥而愛上跑步。
導演劉偉恒嘅跑步原因亦間接同發哥有關，佢指同樣喺疫情期間，好友周家怡邀請佢加入跑隊，而呢隊跑步隊就係由發哥跑步團衍生出嚟，不過佢話自己雖然同過唔少團友一齊跑過步，但係唯獨係自己仲未同過發哥跑過。
張姐分享之前探訪經歷。
提到今次嘅活動，係想令參與者感受缺水社區孩童，每日徒步約6公里取水嘅體驗，對此張姐大讚非常有意義：「我曾經探訪過盧旺達陪過一個小朋友去打水，要上山落山，拎住一個破爛嘅水桶放喺頭頂度，行好遠路打水畀屋企人飲，我覺得用跑步去支持佢哋，係好有同理心。雖然我哋唔使拎住個水桶跑，但係都會明白行咁遠路去攞半桶水，係幾咁辛苦嘅一件事。」
Jay Fung認為生活喺香港係好幸福。
Jay Fung認為生活喺香港係好幸福，大家打開水龍頭就可以有自來水，所以希望藉呢次活動，嘗試感受缺水社區孩童，每日要行好遠拎水嘅生活。身為父親嘅劉偉恒，期待兩個囡囡可以透過活動，強身健體之餘亦可以有更深嘅體會。
劉偉恒指佢哋一家已經練緊跑。
三人除咗係今次嘅活動大使外，同樣係宣明會嘅助養者，其中張姐更成為助養者超過30年，佢滿足地笑道：「有個小朋友，我由佢8、9歲就開始探訪佢，同佢一路有聯絡，佢有嚟過香港，到佢大學畢業做咗律師，之後佢已經變成媽咪，我見到佢嘅成長，好似自己啲小朋友一樣。助養最大嘅意義唔在於我，係在於個小朋友，知道有人幫佢嗰份開心同希望。」張姐表示每次收到助養兒童嘅心意卡及聖誕卡，自己都定會抽時間親自回信。劉偉恒亦喺20幾年前已開始參與助養計劃，佢同樣都有儲起助養兒童嘅書信，並指呢啲都係提醒自己唔只係為自己工作，仲可以照顧到人。
張姐呼籲大家一齊參加。
張姐又分享自己去探訪嘅經濟，佢指有啲脆弱地區會捉小朋友當童兵：「餵佢哋食火藥，佢哋會癲咗，然後等啲小朋友自己攞槍去殺自己條村嘅人。我去探訪過呢啲小朋友，佢哋每晚都發惡夢，見到佢哋眼入面嘅恐懼，同佢哋講咩對眼都唔知去咗邊。」

馮允謙、張艾嘉、劉偉恒擔任活動大使。
雖然多年嚟堅持善行，但張姐直言並唔覺得自己係做善事：「當你覺得自己做緊善事嗰陣，好似覺得自己叻過人哋、優越過人哋。我覺得貧窮唔代表唔快樂，嗰啲苦難嘅小朋友，嗰個真心嘅笑容，係我喺城市度睇唔到嘅。」劉偉恒認同張姐的說法，指幫助別人並非為自己或者自我感覺良好，而是應盡之義。
劉偉恒將與家人參加親子組。
至於講到會邀請邊個一齊參與呢次活動？Jay Fung就話想邀請好友釗峰齊齊跑，而劉偉恒就指已「下令」太太同兩個女兒齊齊落場參加3公里親子組。張姐則鼓勵無跑步習慣嘅人亦都可以參與：「今次唔止係6公里，都有3公里同1公里，無論你想行定跑，你點做都得，最緊要係你有心去支持佢哋。」