吳大強為范明熙一改唱歌習慣 韋綺姍愛女黃芮琳鍾情幕後工作

區瑞強Albert 一連兩晚嘅演唱會嚟到尾場，今次演唱會以親情為題，首次同妹妹區桂芬及細佬區瑞明同台獻唱。Albert話三個人入面，自己係最緊張嘅一個，因為佢擔心妹妹同細佬會緊張，特別係細佬區瑞明係首次上台演出。坦言上到台唔多唔少都有啲緊張嘅區瑞明，就話有阿哥傍住就會心安啲，而區桂芬則指只要哥哥邀請，就會大把機會唱多啲歌畀大家聽。

區瑞強呢日同細佬妹首次同台演出
吳大強今次就搵嚟世姪女小V范明熙合唱，為咗遷就小V，Bill哥哥 就一改唱英文歌嘅習慣，轉唱廣東歌同國語歌。

吳大強呢晚就為范明熙轉唱中文歌曲

全晚嘅演出嘉賓都係同親友合唱，但唯獨 韋綺姍Rita 雖然愛女黃芮琳都有上台，但佢就喺台上獨唱，對此Rita 就話因為Albert當初邀請佢時，有提到覺得黃芮琳唱得唔錯，所以想對方唱一個solo。至於問到黃芮琳會唔會想入行？佢就指幕後工作會比較舒服，但因為自己都鍾意唱歌，所以間中唱一次佢都OK呀。

Rita老師雖然同乖女同台，可惜就未有一齊合唱喇