溫碧霞獲頒「最具人氣中國女演員」獎 憑蘇妲己一角征服泰國影迷

從影多年嘅溫碧霞 Irene ，近日獲《2025年泰國頭條新聞年度風雲人物》頒獎盛典頒發「最具人氣中國女演員」大獎，大會評審更指溫碧霞嘅精湛演技與獨特魅力，贏得泰國觀眾歡心，特別係佢喺電視劇《封神榜》中飾演「蘇妲己」一角，至今都係無數影迷心中嘅經典，大會又指Irene嘅努力與堅持，亦成為唔少年輕演員心中嘅榜樣。

溫碧霞飛到泰國領獎。唔少影迷喺場地等候。

頒獎禮於11月7日於曼谷隆重舉行，剛於廣州開完巡唱嘅 Irene 亦有飛抵當地出席，對於能獲獎佢坦言完全冇諗過，所以得知消息後都相當開心：「對方好有誠意邀請，只本着飛到泰國支持一下頒獎禮及見下當地fans，又諗住開完演唱會，可以乘機玩下，一舉幾得，完全估唔到攞獎，好驚喜！十分多謝大會及泰國fans。」
溫碧霞獲頒「最具人氣中國女演員」大獎。
溫碧霞獲頒「最具人氣中國女演員」大獎。