獨家丨張曦雯率眾美女為台慶排舞 龔嘉欣期待化身魔術女郎

下星期二就係 TVB 57周年台慶大日子啦，張曦雯 帶領住一眾美女藝人，包括啱啱加入公司嘅應屆港姐，一齊為跳舞表演綵排，Kelly之前雖然拍完《臥底嬌娃》練過女團舞步，但佢話今次演出嘅舞步相對難好多，而有份演出嘅黃嘉雯、李芷晴、葉蒨文同黃婧靈都異口同聲話，隻舞真係一啲都唔容易，又要講求合作性，仲大爆戲服暗藏秘密武器添，咁大家就要密切留意啦。
張曦雯 帶領住一眾美女藝人排舞。
張曦雯 帶領住一眾美女藝人排舞。
最近波波拍《冲遊泰國》除咗經常著泳衣上陣之外，更喺社交平台發相狂派福利，原來波波話自己係第一次公開著比堅尼，所以心情都好緊張，而負責幫佢影相嘅胡慧冲，就唔係流晒鼻血，反而係唔小心整傷咗腳搞到流血。
最近波波（左一）拍《冲遊泰國》除咗經常著泳衣上陣。

而羅毓儀、林凱恩、何泳芍、吳子冲等新力軍，亦齊集為台慶夜嘅大型序幕排練，重現當年《歡樂今宵》嘅盛況，有份扮演四朵金花嘅林凱恩同羅毓儀都話覺得壓力山大呀，而扮演上海婆嘅何泳芍，都話要將經典角色重現，真係有一定難度。

龔嘉欣、向海嵐同陳懿德將會同Louis Yan一齊表演魔術。
著名魔術師Louis Yan亦會喺當晚表演大型魔術，佢仲特別揀咗龔嘉欣、向海嵐同陳懿德做拍檔，嘉欣話佢終於等到呢個機會，事關佢覺得自己嘅身形好適合變魔術，而向海嵐同德德就話對Louis Yan嘅魔術表演讚嘆不已呀。