與天地對話｜蔡思貝深情剖白人生感悟 阿Bob錯失與林襄集郵機會感失望

台慶綜藝《與天地對話》會喺11月18日晚首播，節目中特別邀請到余文樂、林盛斌(阿Bob)、蔡思貝(Sisley)同姜皓文分別同攝製隊走訪大堡礁、澳洲北領地、索科特拉島同南也門。四位會喺探索大自然環境下自我展開深情剖白，首度於鏡頭下揭開從未曝光嘅內心深處。阿Bob同思貝現身宣傳活動時，都話被節目內容殺個措手不及，因為從未試過演出一個節目冇稿冇對白，由你自由發揮，結果去到被氛圍影響下，阿Bob吐出好多從未曝光嘅心底話，思貝亦有同樣感覺，甚至講到擔心自己講多咗。

《與天地對話》會喺11月18日晚首播。

經歷自己同自己對話之後，阿bob同思貝對人生感悟呢方面好深刻，返到香港之後，作為四孩之父嘅阿bob特別珍惜家庭，佢話以前例如工作同阿女表演，佢會去工作，但現在有所反思，搵到錢但原來好少見子女會係個遺憾，所以已經叫咗經理人安排工作時要預留時間陪家人。
姜皓文余文樂
思貝喺節目宣傳片中提及自己都有一年冇拍劇，除咗分享呢啲心底話之外，原來拍攝過程中佢仲收到一個難忘驚喜，就係劇組對佢做咗一樣嘢，令佢困擾多年心結解開，如釋重負，呼籲觀眾要睇節目到最後就會知嗰幕係點。
阿Bob對於錯失同林襄集郵嘅機會相當揼心。
臨近年尾有幾部港產賀歲片正在趕工，阿Bob亦有幸參與其中一部葉念琛嘅作品，雖然有工開係開心事，但電影有台灣啦啦隊女神林襄性感演出，阿Bob竟然錯失良機，仲爆當日林襄開工時，全場男性都冇心機拍攝，爭住同女神影相。

而舉行宣傳活動當日，姜皓文同余文樂雖然未能親自嚟到宣傳，但佢哋都預先拍片同觀眾分享。