七師傅被指撞樣華裔女星劉玉玲 化身鑽石山Lucy赴戲院謝票

近期一部荷李活電影《Red One拯救隊》喺香港上映，有份參演嘅華裔女演員劉玉玲被指同玄學師傅七仙羽撞樣，電影公司一於食住個話題上，直接邀請七師傅以Lucy分身為電影謝票，七師傅無論髮型、造型甚至表情，都完美複製Lucy。

海報上嘅劉玉玲同七師傅真係非常相似
一向搞笑嘅七師傅話，好多人見到張電影海報都恭喜佢進軍荷李活，佢仲話自己確實有去荷李活，仲相約朋友去荷里活「廣場」飲茶，原來此荷李活非彼荷李活，七師傅真係好幽默呀！
七師傅話自己都不時出入「荷里活」喎

七師傅次次出現都打扮得靚一靚，不過呢日見佢身上件皮褸爛咗，原來係屋企工人姐姐嘅傑作，七師傅投訴話工人姐姐不單止唔做嘢，仲疑似手腳唔乾淨，事關屋企試過唔見價值超過五萬港幣嘅金條，不過七師傅即管懷疑工人姐姐，但都唔打算追問，佢話因為唔想彼此失去信任，仲話會將失竊嘅物品當作佈施同斷捨離，修行之人果然大氣量。

唔見金條都話唔使報警，果然貧窮係會限制想像嘅