洪永城隨嬌妻腳步首挑戰全馬完賽 梁諾妍終點迎接灑淚反激奀老公

今日除咗一早有機場三跑嘅馬拉松各項賽事之外，日本神戶亦喺同一日舉行年度馬拉松盛事，8月底突然宣佈要突破自己嘅 楊潮凱 就同被運動發燒友太太 梁諾妍 仲有 洪永城 呢對夫婦一齊參賽喇。

洪永城同太太梁諾妍，仲有老友楊潮凱一早已經開始為全馬備戰
洪永城受老婆嘅熱血感染，之前應承齊齊落場參加，隨即就開始連串訓練，之後從未參加過全馬嘅潮凱亦被「傳染」而加入成為練跑大軍成員，近日佢哋飛抵當地，就即刻調整體力同加大炭水化合物吸收備戰喇。
星期日清晨終於上陣參賽

大賽經驗十足嘅Inez率先完賽，雖然比自己預計Sub 4(4小時內完賽)時間差啲啲，不過就一樣滿意自己表現，而之後親自喺終點線迎接老公完賽嘅佢，仲第一時間上前擁抱祝賀，仲激動到落淚。而Tony就一直安撫Inez，不斷話多謝佢訓練自己先可以第一次跑全馬就完成比賽呀。不過最搞笑就係Inez一問明年係咪可以繼續參加，Tony就即時變臉無言喇。

Inez話成績比預期差咗少少
一見老公衝線即刻上前送香吻

全世界各地嘅長跑比賽，大部份都安排於清晨開跑，加上準備時間同比賽消耗嘅大量體能，兩位男參加者Tony同潮凱就被Inez直擊斷電暈倒於回程嘅列車車廂，希望佢哋快充回血之後可以恢復元氣啦。

兩位男士用盡全部體力要好好休息返一陣