麥明詩陀五個月孕肚現身活動報喜 大讚老公貼心照顧晚晚幫手搽lotion

恭喜恭喜！十優港姐 麥明詩 呢日肚突突現身活動，開心宣佈懷孕已5個月。Louisa今年3月同飛機師 盛勁為 結婚，近日盛傳佢地6月去馬爾代夫度蜜月時ㄧ擊即中，計下時間都真係差唔多。準媽媽Louisa心情激動又緊張，好彩身邊有個廿四孝老公貼心照顧，唔止會陪佢做孕婦操，仲好留心太太嘅飲食，最sweet嘅係晚晚都會幫太太擦妊娠lotion。

麥明詩呢日現身活動，公開宣布懷孕喜訊
查實Louisa結婚嗰陣已經講過想盡快生B，相信呢個消息會成為佢下個月33歲生日嘅最好禮物，而且除咗佢哋兩公婆，全家上下都一樣咁開心。Louisa話大家非常關注BB嘅情況，搞到佢都有少少呷醋。雖然妊娠反應令佢有啲唔舒服，不過如果狀況允許，都希望可以追多個，等BB有個伴。
升呢為準媽媽嘅佢呢日都非常高興

又分享老公幾個月來嘅貼心照顧

Louisa嘅好姐妹朱千雪早前亦晉升新手媽媽行列，所以有好多實戰經驗可以傳授，無論係照顧小朋友方面，甚至點同四大長老相處，都俾咗好多貼士，Louisa仲話，唔排除可以同Tracy對下親家喎！