萬千星輝賀台慶丨林峯回家獻唱掀全場高潮 催淚搞笑環節各具特色

11月19嘅係TVB 57歲生日，全台300幾位藝員精彩演出同公司賀壽，除咗有獎金獎品大放送外，仲有好耐冇見嘅藝人回家演出，特別係喺TVB出道嘅林峯，佢嘅演出更掀起全晚高潮，個個都舉機集郵一齊大合唱，麥美恩仲成功突圍同林峯抱抱！

林峯壓軸演出成為台慶一大焦點
阿峯完成表演後雖然未有停步受訪，但都有同總經理曾志偉擁抱傾兩句。而另一位大前輩劉美君亦fit爆現身《萬千星輝賀台慶》現場，率領《中聲》及《聲夢》家族演出。劉美君接受訪問時，就話自己好鍾意同年青一輩一齊工作，但講講下就變咗同顏志恒各自自爆年齡鬥大。
劉美君罕有現身同一眾新晉歌手合作

而曾經戰鬥選美舞台嘅女將，就由張曦雯率領下一齊展現power of woman魅力，相當刺激觀眾眼球。黃嘉雯用「相當有火」嚟形容佢哋嘅演出，而自稱手腳唔協調嘅鄧凱文，就話估唔到自己可以完整咁跳到隻舞呀！
張曦雯同大批女藝員嘅舞蹈非常養眼

阮兆祥、王祖藍同李思捷組成嘅年度娛樂風雲人物環節，就繼續發揮扮嘢搞鬼精神，神還原近期嘅經典，好似即將開騷嘅汪明荃、唱《記憶棉》嘅黃百鳴，同揚言要追「東張女神」梁敏巧嘅Baby Face。呢個環節佢哋仲搵嚟扮嘢鼻祖盧海鵬同移居馬來西亞嘅廖偉雄返嚟一齊玩，佢兩位仲喺台上開金口唱返當年嘅改編金曲《幾許瘋語》。廖偉雄指TVB係自己成長嘅地方，可以返到娘家相當開心，佢又指同鵬哥經常都有見面，而呢次返嚟亦見返好多熟悉嘅面孔，不過由於仲有工作在身嘅關係，所以廖偉雄表示出席完台慶後就要即刻返去馬來西亞繼續工作喇。

祖藍帶領幾位學員扮汪阿姐
鵬哥同燦神兩位搞笑Icon亦有現身

同時又化身Baby Face

仲有纏擾足足半年嘅何生何太

同埋百鳴哥嘅《記憶綿》

今年台慶設有由藝員票選出「全台力撐潛質男女藝人」環節，當 張振朗 同 譚俊彥 分別講出關於兩位得獎者 曾文心 及 廖家爵 嘅故事時，在場唔少人都忍唔住落淚。事後廖家爵表示當日自己拍爸爸病危嘅一場戲時，喺現實生活中佢嘅爸爸「大粒癦」廖駿雄亦同樣病重在院，所以自己拍攝時相當徬徨，同時佢亦好感謝當下譚俊彥陪伴住自己。
廖家爵、曾文心同多位耕耘多年嘅藝員於台上作自我介紹

宣佈老婆黃翠如陀B嘅蕭正楠，成晚都不停收到祝福，喺後台訪問時仲遇到薛家燕亂入祝賀，又追問BB性別，嚇到蕭正楠即時呆咗唔識反應，相當搞笑。事後馬國明就攬住蕭正楠話要黐下對方嘅旺氣，搞到在場嘅胡定欣同蕭正楠都即時起哄話馬明ready做爸爸呀！

準爸爸蕭正楠整日祝賀收唔停