梁朝偉獲科大頒授人文學榮譽博士 分享成功兩大秘訣「當自己係新人」

影帝梁朝偉今日出席香港科技大學學位頒授典禮，獲頒授人文學榮譽博士學位，今年有四位傑出人士獲頒發榮譽博士學位，其中NVIDIA創辦人暨執行長黃仁勳獲工程學榮譽博士，梁朝偉獲人文學榮譽博士，其餘兩位得主分別係諾貝爾化學獎得主邁克爾·萊維特（Michael Levitt）教授、以及菲爾茲獎得主大衛曼福德教授。

偉仔同黃仁勳等傑出人士今日出席頒授學位儀式
梁朝偉喺台上以英語發言，笑指自己未有喺大學生活過，起初唔知應該由邊度講起，佢指從42年嘅演藝經驗當中獲得一啲心得，就係憑勤力同有紀律等要素，加上幸運先達致今日嘅成就。

梁朝偉今日獲香港科技大學頒授榮譽博士學位

梁朝偉講到要成為優秀演員嘅兩大秘訣，首先係接受新工作要保持初心，令自己好似一個新人咁，唔好將自己當係一個有經驗嘅演員，以免拖累自己；然後就係永遠唔好自滿喺自己每次嘅表現，要求自己下次做得更好，梁朝偉強調作為一個演員最重要係喜歡自己嘅工作，一直保持對演出嗰份熱誠。呢日太太劉嘉玲以鮮紅色裝束亮相，於台下參與整個頒授儀式，其後嘉玲與梁朝偉一同接受在場傳媒訪問。

太太劉嘉玲亦陪伴偉仔一齊參與儀式

偉仔全程以英語發言，希望大家做任何事都保持初心