米芝蓮三星主廚安成宰親款待發哥用餐 透露香港開設餐廳全因周潤發

米芝蓮三星主廚安成宰（Chef Sung）為韓國綜藝節目《黑白大廚：料理階級大戰》擔任評審，全球人氣爆紅，安成宰喺香港開嘅餐廳非常難預約，即使每位價錢高達港幣5,888元再收加一服務費，仍有唔少食客慕名而來，更吸引到國際巨星周潤發捧場，安成宰親自款待發哥。

安成宰親自款待發哥周潤發。
發哥除咗深受香港市民擁戴，亦係好多韓國人60至80後嘅偶像，電影《英雄本色》更對韓國人有深遠影響，發哥喺韓國人氣非凡，連劉在錫同BIGBANG都係其粉絲，難怪安成宰親自款待發哥享用晚餐，韓國網民都好驚訝安成宰居然有機會同發哥影相。

發哥除咗深受香港市民擁戴，亦係好多韓國人60至80後嘅偶像。
安成宰噚日喺IG貼出影片並寫上「永遠的大哥，我愛你周潤發」，見安成宰親自款待，又同發哥一齊品嚐紅酒兼碰杯，二人言談甚歡，安成宰以英語向發哥表白，稱自己喺香港開餐廳全因為發哥，皆因佢由細到大一直睇發哥嘅電影，發哥聞言大感驚喜，連番感謝呢位粉絲。

安成宰噚日喺IG貼出影片並寫上「永遠的大哥，我愛你周潤發」。
安成宰所言非虛，皆因佢早前喺訪問亦透露一直視發哥為偶像，13歲嗰年同屋企人移民美國，當時因語言不通，睇電影成為佢嘅最佳良伴，佢最愛睇發哥《英雄本色》同《賭神》，發哥更係安成宰決定喺香港開設餐廳嘅原因之一！

安成宰以英語向發哥表白，稱自己喺香港開餐廳全因為發哥。