周潤發30幅作品展現香港清晨之美 習慣輕裝上陣「打雀」不急不忙

影帝周潤發向來熱愛攝影，又演繹過無數經典角色，今次以另一角色 — 攝影師出現喺公眾面前，利用鏡頭捕捉香港清晨嘅獨特風景與人事物，並以「香港‧晨」為題於2024年12月18日至2025年1月2日喺尖沙咀舉辦慈善攝影展，發哥將喺12月18號現身海港城分享攝影心得。是次展覽嘅主要作品《無題》展示不一樣的維港，展覽分為三個主題區域「香」、「港」、「晨」，共展出30幅由發哥親自拍攝嘅作品，涵蓋花卉攝影、街頭拍攝及「自拍」系列。 

發哥將喺12月18號現身海港城分享攝影心得。

從黑白菲林到數碼相機，發哥以淺景深嘅手法展現清晨城市多樣面貌，自去年以來，發哥熱愛攝影嘅心促使佢提前出門，遊走於七點嘅街頭，捕捉與白天或夜晚截然不同嘅城市風景。發哥當演員前曾喺中環工作一段長時間，對發哥嚟講，呢啲街道承載著佢嘅回憶。 發哥喺街頭拍攝時習慣輕裝上陣，手中只有一部相機及兩支鏡頭。佢拆解一部舊式菲林相機，將其鏡頭光圈葉片移除，以全開光圈拍攝，達到獨特淺景深效果。發哥形容呢種拍攝方式帶嚟「分離感」非常有趣，背景模糊而主體清晰，使中環喺佢嘅鏡頭下顯得虛幻而迷人。發哥從影黑白菲林轉用數碼相機，同樣係逐張逐張慢慢拍攝，不急不忙。

是次展覽嘅主要作品《無題》展示不一樣的維港，展覽分為三個主題區域「香」、「港」、「晨」。
發哥笑稱自己拍攝時就好似「打雀」（雀鳥攝影），預先想好構圖，設置好相機腳架後，耐心等待路人踩中佢嘅「圈套」（對焦點）即按快門；而大光圈讓佢可縮短快門速度，捕捉最合適感覺嘅瞬間。 發哥講起攝影嗰陣，眼眸中閃爍住興奮嘅光芒，佢樂於分享每幅作品背後嘅故事。展覽中嘅主要作品《無題》係一張喺黑雨中拍攝嘅維港照片，當時佢喺海港城嘅露天停車場，捕捉到對岸陰沉天色與未亮嘅燈光，與三艘顏色各異嘅天星小輪形成鮮明對比。發哥覺得呢啲機會非常難得，咁就係攝影嘅魅力。 

發哥笑稱拍攝時就好似「打雀」，設置好相機腳架後，耐心等待路人踩中佢嘅「圈套」。

展覽的三個主題區域中，「香」區係花卉攝影，展現含苞待放嘅陸蓮及盛開黃雛菊，呈現出油畫般嘅夢幻感。「港」區就係捕捉中環清晨嘅忙碌景象，包括裙擺搖曳嘅女士、勤勉清潔工以及三五成群嘅上班族。「晨」區嘅四幅「自拍」作品中，發哥透過玻璃折射，讓自己融入畫面，展現攝影師與被攝者之間嘅微妙互動。 呢次展覽製作限量版展覽紙刊，展出30幅攝影作品將以慈善義賣形式發售，每張均附有發哥嘅親筆簽名。 

呢次展覽製作限量版展覽紙刊，展出30幅攝影作品將以慈善義賣形式發售，每張均附有發哥嘅親筆簽名。

發哥曾於2006年拍攝張藝謀導演嘅古裝電影《滿城盡帶黃金甲》，並捕捉鞏俐黑白化妝照片，該作品最終於2011年以慈善價318萬港元拍賣，再一次證明發哥係一位卓越演員、攝影藝術家及熱心公益嘅慈善家。