嘉玲子華舞台劇正式公演群星爭觀摩 薇薇盼再踏舞台思貝聞老友報喜碌地

由 劉嘉玲 同 黃子華 合作嘅舞台劇呢日正式公演， 林夏薇 蔡思貝 袁詠儀 古巨基 張繼聰 謝安琪 夫婦 蔡一智夫婦 金燕玲 等就獲邀欣賞演出，而啱啱接連獲頒兩個榮譽博士學位嘅 梁朝偉 亦有欣賞太太演出，不過就非常低調到場，現場仲有大批圈中朋友送上花籃祝賀。

偉仔低調到場欣賞嘉玲同子華嘅舞台劇首演
嘉玲同子華呢次合作全港矚目，記者會一宣佈演出就掀起撲飛潮，就連台灣藝人王大陸都慕名來港欣賞。而有飛入場嘅薇薇，就話非常期待呢次神之合作，加上自己於話劇團出身，自然就對舞台演出更加關注喇。
袁詠儀亦有現身欣賞演出

演出過大量劇集嘅薇薇，喺《黑色月光》嘅奸險演出令人心寒，而呢日佢又提到，如果有機會非常想再參與舞台劇演出，非常回味當年嘅回憶呀。至於有傳佢將開設珠寶生意，薇薇就指日內就正式開業，所以近日非常忙碌處理公司事務呀。
表演出身嘅林夏薇指有機會想再上舞台演出

有份入場觀摩嘅蔡思貝，呢日就被問到好姊妹王君馨懷孕嘅喜訊，Sisley指Grace以驚喜方式向佢報喜，當時自己仲興奮到瞓地，非常戥老友開心，佢仲話自己已經估到BB性別，真係見到佢反應都覺得開心呀。

思貝知道老友Grace懷孕後興奮到碌地