StarTalk一氣呵成版｜黃凱芹杜自持合作多年惺惺相惜 合作開音樂會揭一粒音過往故事

近年唔少資深歌手，甚至係經驗豐富嘅音樂人，都會以有別以往嘅方式合作演出，而最近 黃凱芹 同 杜自持 就會有新合作，已經有幾十年合作歷史嘅呢對老拍檔，呢日就接受《StarTalk》 許文軒 專訪，分享多年來合作嘅有趣事。

過往多次合作嘅黃凱芹同杜自持將合作辦音樂會
由當年凡事要經過監製先後向雙方轉告，作曲與主唱亦因為合作而慢慢加深認識，Chris當年仲曾主動要求杜自持為自己編曲，認為對方深得己心，可以話一拍即合。
Chris指當年初合作已覺得Andrew同自己非常合拍

一個作曲一個編曲，雙方都係為藝術創作，自然希望作品以自己意思推出，呢日明明講合作，Chris就重提當年一首《自私》被杜自持改少一粒音，雖然數十載過去，不過依然銘記於心，杜自持就認為Chris熟悉樂理同音樂，所以合作時自己都會加多兩錢肉緊更上心。

一粒音更動並未令佢哋結怨，反而往後更多合作令佢哋更為了解同互相尊重，因為合作演唱會編曲，Chris更以大開眼界為形容。而雙方更深刻嘅，就係當年大熱嘅一首《 I Believe》嘅合作。
呢日佢仲提到因為一粒音而記足多年嘅往事

多年默契同識英雄重英雄之下，亦促成今次音樂會嘅合作，單單為咗定立當中唱咩歌，就已經搞到非常頭痛，Chris就私心非常渴望當年 劉德華 嘅《愛不完》會係自己嘅作品，反觀Andrew亦一樣選中Chris創作俾華仔嘅歌曲《一個人睡》，Chris仲搞笑指自己係靠沖涼或者喺廁所解手時創作唔同作品。

Andrew又指今次演出會同時下其他演唱會唔同，將特別注重Live Band演奏，而Chris就指要先完成為演唱會而生嘅新歌，繼續雙劍合壁，一個寫一個編，之後就開始逐步編排，將演唱會化零為整。