黃百鳴開官方唱歌頻道 爆周星馳同谷德昭秘聞

黃百鳴早前因為翻唱MC張天賦嘅〈記憶棉〉而一唱成名，之後陸續畀人翻出佢同朋友Jam歌嘅片，見網民對自己嘅歌喉咁有興趣，黃百鳴就專登開咗個YoubTube Channel《百鳴歌》，除咗唱下歌畀大家聽之外，仲會同大家講下拍電影嘅趣事。而作為黃百鳴第一條翻唱片，佢就選擇咗唱《人鬼情未了》嘅主題曲〈Unchained Melody〉。

黃百鳴開咗個YouTube Channel 唱歌畀大家聽。
作為頭炮，佢揀咗唱〈Unchained Melody〉。
揀唱〈Unchained Melody〉嘅原因，黃百鳴話呢首歌係自己最鍾意嘅歌曲，鍾意到要喺佢監製兼主演嘅電影《家有囍事》入面，出現咗3次呢首歌。同上次唱〈記憶棉〉一樣，今次黃百嗚照樣都係喺好似70年代歌廳嘅場地翻唱〈Unchained Melody〉，而為咗勾起觀眾嘅記憶，條片入面仲剪咗《家有囍事》嘅片段入去，唔少網民睇完都話啲回憶返曬嚟。
電影《家有囍事》片段

勾起大家唔少回憶。
除咗唱歌之外，喺片尾黃百鳴仲分享咗當年拍《家有囍事》嘅秘聞，佢話當時寫呢個劇本嘅時候，就搵咗三位編劇負責入面三兄弟愛情故事嘅對白，當時佢就搵咗第一次寫劇本嘅谷德昭負責寫周星馳嘅對白，當谷德昭將劇本交畀周星馳睇時，對方睇完就即刻扔返畀谷德昭，仲話：「吓？呢啲就叫對白呀？」
原來當時谷德昭度星爺嘅對白時，曾經被星爺質疑。
黃百鳴指當時谷德昭相當有挫敗感，仲向導演表示要劈炮唔撈，但結果就畀導演鬧咗成粒鐘，仲同佢講：「畀人鬧兩句就話唔撈，咁就真係唔好喺電影圈撈喇！」之後導演教谷德昭先睇晒周星馳嘅戲，了解咗對方係點講對白先再重新寫過，谷德昭真係照做睇晒星爺嘅電影，結果就寫出經典對白「巴黎鐵塔反轉再反轉」，而亦因為咁之後星爺就開始搵谷德昭做佢電影嘅編劇同導演。
黃百鳴喺片中分享返當時情況。
講完秘聞條片都嚟到尾聲，黃百鳴都循例叫大家留意講下想聽佢唱咩歌，網民們就相當給力，紛紛留言點唱，好似〈相逢何必曾相識〉、〈老派約會之必要〉、〈一人之境〉、〈黑玻璃〉、電影《開心樂園》中嘅歌曲等，亦有人留言叫佢講多啲behind the scenes嘅故事。